USA ka Sangguniang Kabataan chairman nadakpan sa buy-bust operation niadtong Sabado sa alas 9:15 sa gabii, Marso 26, sa Brgy. Tanguil, lungsod sa Dumanjug, Sugbo.
Ang suspek giilang si Roy Allan Lambo, 26, taga Brgy. Ilaya, kinsa pipila ka mga semana nang gipanid-an.
Si Police Staff Sgt. Gilbert Encabo sa Dumanjug Police Station nga nahinabi sa Superbalita Cebu, nagkanayon nga si Lambo nalakip sa ilang listahan nga namaligya og drugas.
Ila kining gipalitan og usa ka putos nga shabu nga balor og P500.
Human nila nasikop, sa ilang pag search, si Lambo nakuhaan og laing duha ka mga pakite sa shabu sa iyang possession.
Sumala pa ni Encabo nga tunog kaayo sa ilang lugar ang pagpamaligyag shabu sa SK chairman.
Samtang usa ka welder nasikop sa buy-bust operation, nakuhaag binultong drugas alas 11:00 sa buntag sa Sabado sa Purok Okra, Brgy. Calero, lungsod sa Liloan.
Ang suspek giilang si Lito Flores, 32, minyo, usa ka welder, taga Purok Molave, Brgy. Tayud, Liloan.
Si Police Major Ramil Morpos, hepe sa Liloan Police Station nga nahinabi sa Superbalita Cebu, nagkanayon nga si Flores nakuhaan og usa ka putos sa illegal drugs nga balor og P500 sa buy-bust ug duha ka medium size nga bulto sa shabu.
Mobalor ang tanan og P34, 000 base sa street drug price (SDP).