Mga duwa karon
3:00 pm- Ginebra batok NLEX
6:00 pm- Meralco batok Magnolia
Sa ikaduhang higayon, mosuway pag-ambak sa finals ang defending champions Brgy. Ginebra Gin Kings sa ilang pagpakigbatok og balik sa NLEX Road Warriors sa Game 4 sa semifinals series sa Philippine Basketball Association (PBA) Governor’s Cup karong alas 3:00 sa hapon sa Smart Araneta Coliseum.
Niadto ra untang Dominggo unang nisuway pagsulod sa finals ang Gin Kings apan gipakyas sila sa Road Warriors, 86-85, sa Game 3 nga maoy nakapahak sa ilang labaw sa best-of-five nga kombati, 2-1.
Usa ka dakong sipyat ni LA Tenorio sa himatyong mga segundos maoy hinungdan sa kapildihan sa Gin Kings sa Game 3.
Gusto ni Ginebra coach Tim Cone nga kalimtan na lang sa iyang pambatong pointguard ang maong panghitabo aron makatutok ning duwaa.
“The key for him is just moving on; put it away and move on. That’s all we gotta do. We gotta put it away and move on,” matod ni Cone nga napatik sa www.pba.ph.
Alang kang Cone, kinahanglang mahuman na nila ang series ning higayuna tungod kay seguradong motapon ang momentum sa Road Warriors kon maabot kini sa deciding Game 5.
Sa ilang bahin, ang Road Warriors determinado nga sumpayan pa ang series.
“We would want to prolong the series. Sa amin kasi, the longer the series, the better for us,” matod ni Road Warriors coach Yeng Guiao.
“Their key players are playing heavy minutes, nag-a-average sila ng almost 40 minutes a game. Kami, mas malalim ang rotation, so we can last a longer series. The longer the series is, the better for us.”
Sa main game, ang Meralco Bolts mosuway sab pagsulod sa finals sa ilang pagpakigharong og balik sa No. 1 team Magnolia Ang Pambansang Manok Hotshots sa Game 4 sa kaugalingon nilang semis series.
Ang Bolts napilde sa Game 1 apan nakabawos kini sa nagsunod nga duha ka mga duwa aron pagposte og 2-1 nga bintaha sa series.
Nasayod si Bolts coach Norman Black nga buhaton sa Hotshots ang tanan nilang makaya aron makakita pa og laing pagsidlak sa adlaw hinungdan nga gipangandaman kini nila’g maayo.
“I’m sure they’ll turn up the intensity. Our guys are aware of that already. We’ll be ready,” batbat ni Black.