DAGHAN ang nangutana nako kagahapon nganong dili magpahigayon og grand rally sila kanhi senador Ferdinand "Bongbong" Marcos Jr. ug vice presidential candidate ug Davao City Mayor Sara Duterte-Carpio dinhi sa siyudad sa Davao.
Kini human migawas kagahapon ang balita sa Sun.Star Davao ug Superbalita nga nagdumili si Mayor Sara sa pagpahigayon og rally dinhi.
"Sa Davao City, nag-refuse nako mag-rally diha sa UniTeam," suma ni Duterte-Carpio sa interview sa iyang official Facebook page.
Suma pa niya, "Ambot nang mayor [nagtumbok sa iyang kaugalingon] ninyo diha oi." Wala na hinuon niya gipasabot pa ang mga mga rason nganong laktawan ang Davao City sa mga rallies dinhi sa Davao Region.
Iyang pahayag miguwa human ilang tandem (BBM-Sara) nagsugod sa ilang mga rallies sa Mindanao niadtong Dominggo, Marso 27, niadto sila sa Polomolok ug Tupi sa South Cotabato, niadto sab sila sa North Cotabato, Buluan sa Maguindanao, ug Sultan Kudarat pagkasunod adlaw.
Kagahapon, Martes, Marso 29, gibisita sab nila ang Zamboanga diin gihimo ang grand caravan ug grand rally.
Alang sa mga supporters sa BBM-Sara, ayaw lang kaayo kamo kabalaka kay segurado naman nga daug sila dinhi sa Davao City, bisan pa og di mag-rally ug mamilit og campaign posters.
Nganong nakaingon man ako niini? Kini tungod kay lig-on kaayo ang makinarya sa Hugpong ng Pagbabago sa siyudad. Maayo man gud kaayo ang pagkaplastar sa ilang organizational structure gikan sa chairman paingon na sa pinakaubos nga precinct team leaders.
Ang precinct team leaders mao kini ang mobraso sa kampanya sa usa ka presinto. Buot ipasabot, ilang himuon ang tanan nga paagi aron nga modaug ilang kandidato.
Gani, sulti pa sa akong amigo nga empleyado sa City Hall, ila nang gipatapok ang mga precinct team leaders niadtong miaging semana aron segurohon ang kadaugan sa eleksiyon.
Dugang pa niya, ang mando kanila segurohon nga makuha ang 95 porsiyento nga boto sa mga Dabawenyo. Kung mao kini, singko porsiyento na lang ang bahinon sa uban nga mga kandidato? Busa, alang nila, di na kinahanglan ang rally ug caravan kay daug naman ilang mga kandidato.