Nagbalhinbalhin og lane nalatayan sa bus

NAMATAY diha-diha ang mangomprahay og manok human nalatayan sa bus de pasaheroan alas 8:40 sa buntag sa Martes sa Brgy. Tangbo, lungsod sa Samboan, habagatang Sugbo.

Si Damiano Basay, 53, minyo, taga Brgy. Tumalog, lungsud sa Oslob, namatay diha-diha human nalatayan sa bus.

Gitanggong sa police station si Jomar Silvano, 30, taga Brgy. Tapun, lungsud sa Dalaguete, driver sa Sunray’s Bus, human sa insidente.

Si Police Chief Master Sgt. Beethoven Rocamora, imbestigador sa Samboan Police Station nga nahinabi sa Superbalita Cebu, nagkanayon nga si Basay padulong mangompra’g mga manok sa Brgy. San Sebastian, Samboan.

Nagsunod niya ang bus nga padulong sa dakbayan sa Sugbo.

Si Silvano nibutyag nga niserbato siya kang Basay, kinsa nagpatunga sa karsada.

Nipadaplin kini, apan sa dihang mo-overtake na unta siya, kalit nga nibalik sa tunga si Basay hinungdan nga naligsan ug nalatayan sa likod nga ligid.

“N____t iyang ulo, hasta ang helmet. Kusog sab nagkapadagan ang biktima. Kini gud siya kanang estelo sa pagmaniho, mokalit pagpatunga unya mopadaplin,” dugang ni Rocamora.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph