MOLUSAD og one time, big time Oplan Baklas ang kapulisan sa probinsya sa Sugbo nga pangulohan sa Commission on Elections, Department of the Interior and Local Government (DILG) inabagan sa Armadong Kusog sa Pilipinas.
Matod ni Police Colonel Engelbert Soriano, hepe sa Cebu Police Provincial Office (CPPO), nga nagtagbo na sila sa election supervisor sa Comelec.
Ilang nasabotan nga karong semanaha ilang ilusad ang pagpanangtang sa campaign posters nga nabutang sa publikong lugar.
Way pilion ang kapulisan nga panagway sa kandidato kon nabutang sa gidili nga dapit sama sa poste sa kuryente, punoan sa kahoy, koral nga gipanag-iya sa gobyerno o kaha sa mga dapit nga naa sa publiko ila kining tangtangon.
“Doon po sa mga candidates na ang concern nila ay mabaklaysan sila ng mga campaign posters, ang assurance ko po ay we’ll be very, very fair.
Kahit sino ang nasa poster, kung illegally placed yan o posted yan, tatanggalin po namin yun. Hindi na kami titingin kung sinong mukha na nakalagay doon basta illegal poster, illegal po yun,” matod ni Soriano.
Awhag lang sa tanang mga kandidato sa kalungsuran nga samtang wala pa sila magsugod sa pagpanangtang sa campaign posters diha sa kadalanan, sila na mismo ang mokuha aron dili mausik ang ilang gasto.
Nasayod na ang mga magpapili kon unsa nga mga lugar diin sila magpapilit sa ilang mga hulagway ug unsa usab ang gidili sa balaod.
Samtang sukad nagsugod ang kampanya sa kalungsuran niadtong Marso, 25 wala pay nadawat nga problema ang kapulisan.
Sa 44 ka mga lungsod ug unom ka mga siyudad sa probinsya, adunay dili momenos walo ngadto sa siyam ka mga kandidato ang ningdangop sa kapulisan human nakadawat og hulga sa kinabuhi.
Matod ni Soriano nga ila na kining giduso ngadto sa Police Regional Office 7 (PRO) aron mapaubos sa threat assessment alang sa paghatag sa siguridad niini.
Ang gihatagan lang sa hugot nga siguridad sa kapulisan ang kasamtangan nga mayor sa lungsod sa San Fernando, Lakambini Reluya, human sa pagpatay sa magtiayong Baringui-an niadtong Pebrero 13, 2022.