KAY gipul-an na ang mga kawani sa Cebu City Hall sa pagbalikbalik og hakot sa mga basura gikan sa 15 ka mga dapit nga ilang gitawag og “hotspot,” ila kining gipamutangan og mga tanom.
Mao kini ang gibutyag ni Cebu City Environmental and Sanitation Enforcement Team (Ceset) chief Grace Luardo sa interbyu sa Superbalita Cebu human sila nakabantay nga gihimo nang naandan nga labayanan basura ang pipila ka mga dapit.
Sa kadaghan sa mga basura, maabtan sila og buntag sa pagpanghakot.
Gimandoan usab sila ni Mayor Michael Rama sa pagpanindot sa mga bati nga dapit hinungdan nga ila usab kining nahuna-hunaan nga paagi.
Ang mga hotspot kasagaran naa sa Barangays Calamba, Lahug, San Roque, Sambag 1, Camputhaw ug Carreta.
Matod ni Luardo nga ang mga dapit nga ilang gipamutangan og mga tanom wa na dam-oki og mga basura.
Nalipay sila nga wa hilabti ang mga tanom nga ilang gipamutang. “ Pwera buyag wala man sad.”
Iyang giklaro nga ang mga barangay nagkooperar kanila kay kon di, manubag sila base sa Republic Act 9003 kun Ecological Solid Waste Management Act of 2000.
Ang mga barangay dunay ilang environmental officers ug abagan usab sa mga barangay tanod sa pagpatuman sa solid waste management nga gitumong alang sa saktong paghipos sa mga basura.
“Oo kay madaut gyud sila kon i-take for granted nila (barangay officials) labina kon tinuoron nato,” matod ni Luardo.
Siya nipahimangno niadtong mga tawo nga maghugawhugaw sa siyudad tungod sa bug-at nga mga multa.
Sa magpataka og labay og basura, mangihi ug mangluwa, nagtangag kini og P500 nga multa.