Gipanglantawan nga ang kaso sa Covid-19 sa nasud mokunhod ngadto sa 70 matag adlaw sa hinapos nga bahin sa Abril.
Kini sa higayon nga magpadayon ang pagsaka sa vaccination rate lakip na ang booster shots, matod pa ni Health Secretary Maria Rosario Vergeire.
Base sa projection sa mga eksperto nga kon padayon ang pagtamod sa minimum public health standards (MPHS), mokunhod ngadto sa 20 porsento nga moabot sa 670 ka mga kaso ang pag-ubos matag adlaw sa katapusang bahin sa Abril.
“Ang mga projections po ay base sa mga assumptions. Anything can still happen,” si Vergeire nagkanayon.
Nasayran nga gikan sa Marso 21 ngadto sa 27, ang average daily Covid cases anaa sa 389.
Ang top 5 regions nga nakadugang og bag-ong kaso sa Covid sa milabayng semana mao ang National Capital Region, Calabarzon, Central Luzon, Central Visayas ug Western Visayas.
Samtang ang DOH nakatala og kinatibuk-ang 752 nga nangamatay sa Covid-related.
Si Dr. Edsel Salvana sa Department of Health – Technical Advisory Group nipahinumdom sa publiko sa pagkamahinungdanon sa kanunayng pagsul-ob og face mask aron dili mokatap ang virus sa nasud. (SunStar Philippines)