Nakapaduda sa kapulisan ang pangangkon sa 19-anyos nga dalaga nga naka-chat pa sa iyang inahan niadtong Marso 26 sa kaadlawon nga nangayo og pakitabang kay matod pa, siya gi-kidnap.
Ang hepe sa Cebu Police Provincial Office (CPPO), P/Colonel Engelbert Soriano, nimando sa station commander sa Consolacion Police Station nga palawman ang kaso ni Jherica Auman, 19, tinun-an sa Grade 11 nga taga-Sityo Tawagan, Barangay Tayud, Consolacion.
Si Auman wa na mopauli sa ilang panimalay sukad nilakaw niadtong Marso 22.
Matod pa ni Soriano nga aduna nay gihimong inisyatiba ang kapulisan sa maong lungsod aron nga mapaspasan ang imbestigasyon.
Subayon sab sa kapulisan kon tinuod ba nga nalambigit sa ilegal nga druga ang dalaga nga unang gitug-an sa inahan niini, nga kini matod pa, tig-deposit sa kwarta nga kita sa ilegal nga drugas sa drug personality nga wala lang una nganli sa kapulisan.
Matod ni Soriano nga kon involved ang dalaga sa drugas, wa kini dagita, kon di nikuyog.
GAMITON SA POLITIKA?
Nabalak-an ni Soriano nga ang giingong pagpangdagit hayan gamiton sa politika sa maong lungsod ilabi na nga nagkaduol na ang piniliay.
“Kasi this will create a negative atmosphere pag ganitong mga insidente lalo na na approaching nga tayo ng election, hindi nga siya election related pero alam nyo na baka lang gamitin,” matod Soriano.
Una nang nibutyag ang inahan sa dalaga nga si Marifel Auman nga adunay grupo sa mga lalaki nga nagsakay og van ug nipaila nga mga sakop sa Philippine Drug Enforcement Agency (PDEA7).
Nangita ang nagpaila nga PDEA kang Jherica nga giingong maoy tigdeposito sa kwarta nga kita sa illegal nga drugas gikan sa usa ka drug personality.
Nipasabot si PDEA 7 Director Levi Ortiz nga matag adunay lakaw o operasyon ang iyang mga sakop, aduna gyud kini mission order.
Apan walay record ang buhatan sa PDEA nga nabutang ang ngalan sa drug personality.
WAY NAKA-RECORD
“Kining PDEA kada lakaw nato naa man tay gitawag nga mission order nga ako gyud ang mopirma. Nya naa pud tay coordination report diri sa atoang regional operations center atong gipatan-aw,” saysay ni Ortiz.
Gipahibawo sa opisyal nga way record nga adunay lakaw ang PDEA didtong lugara ug ang involved ang drug personality.
“So negative sa PDEA meaning to say gigamit ang pangalan sa PDEA kon kinsa man gani tong niadto adtong lugara,” sigun ni Ortiz.
Dili na bag-o kang Ortiz nga gamiton sa mga kriminal ang ngalan sa ilang ahensya alang sa illegal nila nga binuhatan.
Apan ning nagsunodsunod na nga pagdala sa pangalan sa ilang ahensya, naalarma na ang director.
Base sa record sa ilang buhatan, mag-average sila og duha ngadto sa tulo ka reklamo matag adlaw nga adunay mogamit sa ngalan sa PDEA diin manakop kinig mga drug personalities.
“Usahay diha sa atong blotter duha-tulo sa usa ka adlaw ang moari diri moreklamo kay gidakop ang ilang anak. Wala mailhi unya ang uban magpaila nga PDEA kuno pero dili tinuod,” dugang ni Ortiz.
Nakig-alayon na sila sa pamilyang Auman aron sa pagsubay kinsa ang mga lalaki nga sakay sa van.