DUHA ka giingong sigbin ang nagbugno nga gikalisang sa mga residente sa usa ka purok sa Barangay Malabog, Paquibato District, Davao City, alas 10 sa gabii niadtong Martes.

Sa impormasyon nga nahipos sa Superbalita Davao pinaagi sa usa ka kasaligan nga impormante, usa ka alyas Narcisa, 49-anyos, molupyo sa dapit, ang giingong mitaho sa ilang barangay human sila ug ang iyang mga silingan ang nangalisang sa hitabo.

Giingong perte nilang hinanoka apan nakamata sila sa kasaba sa ilang mga manok.

Pag-umbaw sa bana ni Narcisa sa bintana, perte nilang kurata dihang nagbugno ang duha ka sigbin kay nag-ilog sa buhi nga manok.

Sumala ni Narcisa, karon pa lang sila nakakita og sigbin sa ilang dapit, luyo sa mga istorya niadto nga manaka kini'g balay ug manghilabot og tawo.

Dali sab nga nanagan ang sigbin dihang dali nga migawas ang bana ni Narcisa nga nagdala og sundang.

Hinuon, wala pa’y nataho nga istorya nga mopatay og tawo ang sigbin.

Nagbantay na hinuon ang katawhan sa dapit aron dili mahilabtan sa sigbin ang ilang mga kahayopan sama sa mga manok.