Sama sa gilauman, mahitabo ang panagharong og balik nila ni Nonito “Filipino Flash” Donaire ug Japanese “Monster” Inoue ug ning higayuna, mas mahinungdanon ug mas dako ang pagailugan.
Gikompirmar sa www.boxingscene.com nga magsangka og balik ang top two bantamweights sa kalibutan karong Hunyo 7, 2022 sa Saitama Super Arena sa Japan.
Nakasugal ning awaya ang World Boxing Association (WBA) ug International Boxing Federation (IBF) bantamweight titles ni Inoue hasta ang World Boxing Council (WBC) belt ni Donaire.
Wala pa’y opisyal nga pag-anunsyo sa away apan nasayran sa www.boxingscene.com gikan sa kasaligang tinubdan nga ipahibalo ra kini sa umaabot nga mga adlaw.
Si Inoue, kinsa adunay impresibong 22-0, 19KOs nga rekord, nidaog sa premirong away pinaagi sa unanimous decision niadtong Nobiyembre, 2019.
Nidaog man tuod si Inoue apan grabe nga bun-og ang iyang nahiaguman gikan sa mga kumo ni Donaire, kinsa adunay 42-6, 28KOs nga rekord.
Makapaukyab nga binukbokay ang nasaksihan sa premirong away hinungdan nga gihandom gyud sa boxing fans nga magkrus og balik ang dalan sa duha ka dekalidad nga mga boksidor.
Si Donaire nibawi gikan sa iyang kapildihan batok kang Inoue pinaagi sa pagposte og duha ka impresibong kadaugan sa nagsunod niyang duha ka mga away.
Sa iyang bahin, si Inoue yano sab nga midispatsar sa nagsunod niyang tulo ka mga away human sa panagsangka nila ni Donaire.
Milanat sab og taas nga panahon una nahan-ay kining maong gikahinamang rematch.