Bag-ong Police Community Precinct (PCP) nga nahimutang sa karaang building sa Barangay Adlaon sa bukirang dapit sa siyudad sa Sugbo gipabendisyonan ug giinagurahan kagahapon, Marso 30, 2022.
Matod ni Police Lieutenant Col. Maria Theresa Macatangay, information officer sa Cebu City Police Office (CCPO), nga walo ka dagkong barangay ang hurisdiksyon sa bag-ong PCP diin adunay 11 ka police personnel nga gidestino nga kasagaran gikan sa Talamban Police Station ug Mobile Force Company.
Sakop sa maong PCP ang walo ka mga barangay nga kanhi hurisdiksyon sa Talamban Police Station ug Mabolo Police Station nga mao ang Barangays Tabonan, Paril, Adlaon, Taptap, Guba, Lusaran, Cambinocot ug Tagbao.
Apan, dugang gipasabot ni Macatangay nga dili pa hingpit o regular ang duha ka PCP human giproseso pa ang mga dukumento niini sa National Police Commission.
Matod ni Police Colonel Roderick Minong, deputy regional director for operations sa Police Regional Office (PRO) 7 , nga niduso na og mga rekisitos ang CCPO ug nagpaabot nalang silag approval gikan sa Napolcom.
Si Konsehal Philip Zafra, chairman sa peace and order sa Konseho sa dakbayan sa Sugbo, nagkanayon nga dugay na nga angay madungagan og police station tungod sa kadako na sa siyudad.
Gani, sa ilang mga tigum sa kapulisan, kinahanglan nga aduna nay 20 ka police stations ang dakbayan, ang uban ipamutang sa bukirang dapit tungod kay daghan na ang nagpuyo sa bukid.
Gisaad ni Zafra nga ang Kagamhanan sa Dakbayan mohatag sa tanang gamit sa PCP sama sa computers, patrol car, gasolina lakip na ang komunikasyon ug ang allowance sa mga personnel.
Tungod niini, gihangop ni Kapitan Nieves Nara sa Adlaon ang pagpili sa iyang lugar nga maoy butangan sa PCP sanglit dali ra unya masulbad ang bisan unsa nga krimen sa ilang dapit.
Iyang giangkon nga kon manginahanglan sila og pulis kaniadto, kinahanglan pa sila nga modagan sa Talamban apan inig responde, wala na ang mga mihimog kriminal.
“Naa toy respondehonon, layo pa tawon pagdagan ngadto sa Talamban. Inig abot ngari wala na nanagan na ang mga suspek,” matod ni Nara.
Gitinguha sa CCPO nga magtukod gyud og duha ka police stations sa mga bukirang barangay aron mabahin sa hinggpit ang hurisdiksyon sa Talamban, Mabolo ug Pardo Police Station.
Usa sa gibutangan og PCP ang barangay Malubog nga mamahimo na usab sa dili madugay nga Station 12, diin walo usab ka mga barangay ang iyang hurisdiksyon.