Gipangandaman pag-ayo sa kapulisan sa siyudad sa Sugbo ang laing dakong kalihukan sa dakbayan karong Sabado sa gabii, Abril 2, sa Cebu City Sports Center (CCSC).
Si Senate President Vicente Sotto III, usa sa mga kandidato sa pagka bise presidente sa nagsingabot nga eleksiyon sa Mayo 9, 2022, mohimo og political rally uban sa mga sikat nga personalidad sa noontime show nga “Eat Bulaga.”
Gumikan niini, nagmiting ang Cebu City Police Office (CCPO) uban sa organizers aron dili na masubli ang nahitabo sa Arat Na Concert niadtong Sabado nga nisangpot sa duotduot hangtod nga aduna nay naangol.
“We guarantee nga dili na to mahitabo balik. We have made some strong requirements sa atong mga organizers nga mohimo og ingon ato nga kalihukan balik diri sa Cebu City,” matod ni Macatangay.
Unang gipahibawo ngadto sa kapulisan nga himuon sa laing lugar, apan nausab kini, diin sa CCSC gihapon ipahigayon.
Gibutyag ni Macatangay nga kon 250 ka personnel ang ilang gipakatap sa Arat na Cebu concert, karon nangandam silag 350 ngadto sa 400 ka mga pulis aron masiguro nga dili na masubli ang insidente ug mahatagan sa husto nga seguridad ang political rally.
Adunay rekisitos usab nga gipangayo ang CCPO ngadto sa organizers.
Kon dili kini makab-ot, sila na sa kapulisan ang morekomendar kon unsay angay nga buhaton atol sa kalihukan.
Gipangayoan og security plan ang organizers nga mao usab ang basehan sa kapulisan.
Niduso usab sila sa ilang plano nga nauyonan sa tanan.
Si Konsehal Joel Garganera, pangulo sa Emergency Operations Center, sa iyang bahin, nagkanayon nga naa nay template nga sundon bisan kon adunay nasugatang mga problema sa milabay nga dakong event sa CCSC.
Alang niya wala siyay problema basta naa lang sa outdoor ilusad ang dagkong mga kalihukan ug ang mga motambong mosunod lang sa health protocol sama sa pagsul-ob kanunay sa face mask.
Gipasa niya sa organizers kon gusto niini nga ang makatambong kadto lang mga bakunado pinaagi sa pagpangayo sa vaccine card.
Apan sila sa EOC ni-discourage sa pagpasulod sa mga menor de edad sa venue sanglit sila ang peligro sa disgrasya ilabi na kon magduotduot na ang mga tawo.
“We discourage minors kay we’ll never know kay kanang mga duotduot unya sa size nila dili gyud na sila ideal nga paapilon anang mga dapita,” matod ni Garganera.
Niuyon si Garganera sa gibutyag sa Department og Health (DOH) nga ‘super spreader’ ang Arat na Cebu sanglit ang tanang panagtapok mahimo man kini nga tinubdan sa dakong tinakdanay.
“You know all gatherings are potential spreader, labi na og dagko nga gatherings are potential super spreader pud no. Pero sama sa akong gisulti ug kon ang atong area is outdoor open air, nya mag facemask ta and then bakunado ta, so there’s nothing to worry,” dugang ni Garganera.
Giangkon usab niya nga adunay lapses sa Arat na Cebu apan wala siya mobasol niini tungod kay nabag-ohan ang tanan gumikan kay karon pa nibalik ang mga tapuktapok human niigo ang pandemya sulod sa kapin duha ka tuig.
Daghan usab ang mga tawo nga ningsaksi sukwahi sa ilang gipaabot nga gidaghanon sa tawo.