Magtinaktakay ang host Golden State Warriors ug Memphis Grizzlies sugod karong alas 9:00 sa buntag, Mayo 22, 2021 (RP time), sa katapusang adlaw sa play-in tournament aron ilugan ang nahabiling usa ka puwesto sa playoffs sa National Basketball Association (NBA).
Ang modaog ning sangkaa mao ang makaangkon sa No. 8 nga luna sa Western Conference samtang ang mapilde manamilit na sa 2020-21 season.
Kini maoy ikaduhang higayon nga mosuway pag-abante sa playoffs ang Warriors ning bag-ong format nga play-in tournament.
Sa premiro nilang pagsuway, gipakyas sila sa defending champions Los Angeles Lakers, 103-100, niadto lang Mayo 20, 2021.
Masaligon ang Warriors nga makabangon ra dayon sila gikan ning maong kapakyasan ug gilaumang ihabwa nila ang ilang kapungot ngadto sa Grizzlies.
“It is a win-or-go-home scenario,” matod sa lider sa Warriors nga si All-Star Stephen Curry.
“We’ve had a high confidence and put together a string of wins and then had a tough loss and had to bounce back. So we’ve been there.”
Sa ilang bahin, ang Grizzlies taas sab og moral human nila napalagpot ang San Antonio Spurs, 100-96, sa ilang play-in nga kombati niadto sab Mayo 20, 2021.
“Our plan is to pack for a three-game road trip,” matod sa usa sa labing mga sinaligan sa Grizzlies nga si Ja Morant.
Sa katapusang panagharong sa duha ka mga kampo sa regular season, ang Warriors ningmakmak sa Grizzlies, 113-101, sulod sa bag-o nilang balwarte nga mao ang Chase Center sa San Francisco. (AP)