Patay ang drayber sa habalhabal ug iyang pasaherong babaye human sila gibanhigan sa Purok Gemilina, Barangay Tilhaong, lungsod sa Consolacion, alas 12:10 sa udto, Huwebes, Marso 31.
Ang pasahero giilang mao si Marites Aniñon, hingkod, taga dalan B. Rodriguez, Dakbayan sa Sugbo ug ang drayber nga si Perlito Lacaron, hingkod, taga Barangay Calamba, dakbayan sa Sugbo.
Ang duha nakaangkon og daghang mga samad pinusilan sa nagkadaiyang bahin sa lawas.
Si Police Staff Sgt. Rechie Gilleran, imbestigador sa Consolacion Police Station nga nahinabi sa Superbalita Cebu, nagkanayon nga nakadawat sila og tawag sa telepono kabahin sa mga biktima sa pagpamusil.
Sa ilang pag-abot sa dapit, ilang naabtan ang duha nga nagbuy-od na sa dalan.
Gidali nila sa pagdala sa Eversley Child Sanitarium Hospital sa Barangay Jagobiao, dakbayan sa Mandaue apan gideklarar nga dead-on-arrival (DOA).
Ang mga biktima nagsakay sa motorsiklo nga gimaniho ni Lacaron, kinsa nailhan pinaagi sa iyang identification (ID) card sa Edlab Riders Club Inc.
Matud ni Gilleran, awaaw ang dapit ug walay nakakita sa pagpamusil.
Wala nila isalikway ang posibilidad nga gisundan ang mga biktima sa mamumuno.
Wala pa usab masayri sa kapulisan kon nganong ang duha ning-abot sa naasoyng dapit.