Patay diha-diha ang messenger sa usa ka insurance company human pusila sa nagbinugtong nga mamumuno sa Sityo Lawis, Barangay Lorega San Miguel, siyudad sa Sugbo, pasado alas 6:00 sa gabii sa Miyerkules, Marso 30.
Si Police Staff Sergeant Nemesio Denopol niila sa biktima nga si Arnie Nulan Puyat, 26, taga Guadalajara, Barangay Guadalupe, siyudad sa Sugbo.
Matud ni Denopol, si Puyat nagsugba og karneng baboy tungod sa salo-salo sa adlawng natawhan sa maguwang sa iyang kapuyo nga usa ka barangay tanod sa Lorega San Miguel.
Apan wala na matiwas dihang nahagba na si Puyat human maigo sa dughan hinungdan sa iyang hinanaling kamatayon.
Dugang ni Denopol nga sa ilang pakisusi sa kapuyo sa biktima, giingong si Puyat dunay mga nakaaway sa milabay nga mga adlaw nga giingong usa ka grupo. Usa kini sa mga anggulo nga subayon sa Parian Police Station sa ilang imbestigasyon.
Ang Scene of Crime Operations (Soco) personnel nakarekober og tulo ka kabhang sa mga bala sa gituohang gikan sa kalibre .45 nga pistola.