DIGOS CITY, Davao del Sur -- Daw di mahulgan og dagom gumikan sa kadaghan sa mga supporters nga mitambong sa grand rally sa UniTeam nga gipangunahan nilang presidential aspirant Ferdinand "Bongbong" Marcos Jr. ug vice-presidential candidate Mayor Sara Duterte-Carpio, Marso 30, 2022 didto sa Barangay Tres de Mayo, ning siyudad sa Digos.

Makita sa mga live feed sa Facebook nga perte kadaghan sa mga supporters, itandi sa mga nangadto sa rally sa Kalinaw Dabaw, People's Davao Rally niadtong Marso 24, 2022 didto sa Digos City Coliseum.

Tungod sa kadaghan sa mga supporters, ug gumikan sa kainit sa panahon, ubay-ubay ang mga nakuyapan ug dali sab nga gi-respondehan sa mga naka-standby nga mga rescuers, hinuon pipila ka minutos human sa gihimong first aide naulian ang mga nakuyapan.

Aron nga mapatunhay ang dagsa sa mga supporters ug alang sa kaluwasan batok sa mga tawo nga dunay dautang tinguha, ang Davao del Sur Provincial Police Office (DSPPO) dunay kinatibuk-ang 600 ka mga pulis ang gipang-deploy, diin ang 150 niini gikan mismo sa Digos City Police Station.

Sumala ni Police Lieutenant Colonel Hamlet Lerios, hepe sa Digos City Police Station nga nagpasalamat sila sa kooperasyon sa katawhan diha sa pagtuman sa mga butang nga gipasunod sa awtoridad alang sa kahapsay og kalinaw.

Ang grand rally sa Davao del Sur maoy ulahing rally sa UniTeam sa Davao Region sa bulan sa Marso diin sa buntag pa lang natigayon na ang grand rally alang sa Davao del Norte didto sa Carmen Ground, Carmen, Davao del Norte diin gisundan pagka-ala una sa hapon sa Pantukan, Davao de Oro.

Nagpasalamat si BBM sa mga supporters ug nanaad kini nga mas palambuon pa ang Pilipinas, "Samahan ninyo ako sa ating pag-unlad, sama-sama tayong babangon muli," tipik sa pamulong ni BBM.

Samtang si Mayor Sara nagpasalamat sab sa walay-puas nga suporta sa katawhan ngadto kaniya ug gipasalig niini nga ang "Buil Build Build program" sa administrasyong Duterte maoy usa sa mga daghang giprayoridad nga ipadayon sa UniTeam.

Nagpasalamat sab si BBM ug Mayor Sara ngadto kang Davao del Sur Governor aspirant Mayor Carl Jason Rama Bautista sa mainitong pagdawat niini sa UniTeam ticket diin ang mga senador kompleto sa linyada sa maong rally.

Sumala ni Rama nga usa ka dakong dungog sa Barug Davao del Sur sa Hugpong Ng Pagbabago (HNP) nga anaa sa linyada sa UniTeam.

Perteng hugyaw ug grabeng pagmaya sa mga taga Davao del Sur dihang namulong na si Rama una paman nangabot ang senatorial candidates ug ang magtandem nga sila BBM ug Mayor Inday.

Samot ang pagsiyagit sa kalipay sa bagang supporters dihang miingon ug mipasalig si Rama nga iyang ipadayon ang scholarship.

"Ayaw mo og kabalaka, atong ipadayon ang scholarship," tipik sa giingon ni Rama uban sa iyang mga plataporma de gobyerno.

Pasada alas 8 na sa gabii natapos ang grand rally ug gisundan kini sa konsiyerto nga gilingaw sa sikat nga Philippine rock band nga Aegis.