GIPANEGURO sa Davao City Veterinary Office (CVO) nga ang dakbayan pabiling luwas sa "bird flu," apan gihugtan ang pag-amping sa mosulod nga mga poultries human sa padayong "outbreak" sa Avian Influenza (AI) H5N1 sa daghang probinsiya sa Luzon ug Tacurong City sa Sultan Kudarat nga gikabalaka og maayo.
Gisulti ni CVO head Dr. Cerelyn Pinili sa paghinabi kaniya sa radyo niadtong Miyerkules, Marso 30, nga ang pagpahugot sa pag-"screen" nahitabo sa dihang mga kaso sa bird flu nadeparahan sa Luzon, ilabi na sa Tarlac, Pampanga, ug Bulacan, samtang naa say mga kaso sa Tacurong, nag-inusarang lugar sa Mindanao, nga bag-ohay lang nadeparahan.
"Kato nga mga area, ban gyud ang pagpasulod sa manok diri sa Mindanao," butyag ni Pinili sa paghinabi kaniya sa 87.5 FM Davao City Disaster Radio.
Sumala sa Department of Agriculture (DA) Memorandum Circular 6 Series of 2022 nga gipagawas niadtong Martes, Marso 29, ang pagbiyahe sa mga domestic ug nadakpan nga mga langgam ug mga manok ug mga karne niini sa mga nahisgutang lugar gidili.
Gikanayon sa DA nga ang palisiya sa pag-regulate sa lihok sa mga pato, manok, pugo ug uban pang mga poultry products sa mga naapektuhan nga lugar, ilabi na kadtong gikan sa usa ka kilometro nga quarantine area.
Dugang ni Pinili nga ang lokal nga panggamhanan naghimo "surveillance testing" ngadto sa nagkadaiyang manokan, ug way poultry nga nakompirma nga nataptan sa makamatay nga avian flu.
"Based sa among monitoring, wala sa pagkakaron. Naa man puy ubay-ubay nga mga farms nato na gikuhaan og samples, result is negative man pud," pagtin-aw niya.
Sumala pa nga gimandoan na ang mga personahe nga nagbantay sa mga checkpoints dinhi nga salaon ang pagsulod sa mga manok human giimposar ang pag-ban sa mga produkto gikan sa mga lugar nga dunay nakompirma nga bird flu outbreaks.
Nagmuntan ang siyudad og veterinary checkpoints sa nagkadaiyang entry points sa dakbayan – Lasang, Calinan, Marilog, ug Sirawan sa Toril.
Sumala sa World Health Organization (WHO), mga tawo puwedeng nataptan sa kagaw nga avian.
Ang pagtakod sa tawo makuha pinaagi sa direktang kontak sa mga hayop nga nagkasakit niini o kontaminadong lugar.