Tungod kay daghang mga ginikanan ang nakaangay sa akong lindog niadtong Sabado, bisag ang uban nangaigo sa hilom, akong sumpayan ug dungagan ang tips kon unsaon pagmatuto ang atong mga bata sa sayong pangidaron.
Kining mosunod maoy mga pulong ug buhat nga di angay ipaguwa sa baba sa mga hamtong labina kon gagmay pa ang mga bata.
Una ang pagpakonsensiya o pamuyboy sa mga bata sama sa pag-ingon ‘ikaw ang nagpabug-at sa atong pamilya, dako na mi og gasto nimo, nalunod nami sa utang ginasto nimo, nabuktot nami pinangita og kwarta para ibayad sa imong pagtungha o kapoy kaayo ka atimanon'.
Kon kini balikbalikon og sulti ngadto sa mga bata, dunay taas nga puruhan nga sayo sila makabati og depresyon. Unya mahadlok na hinuon kini moduol nimo para mangayo og tabang kon dunay gikinahanglan sa ilang pagtungha o gibati sa panglawas.
Subo palandungon kay tungod ini dunay maihap nga mga kaso nga ang mga bata mismo nakat-on na hinuon pagpamakak o himo og krimen sama sa pagpangawat sa sayong pangidaron aron matubag ang ilang panginahanglan.
Sunod ang pagkumparar sa bata ngadto sa igsuon o laing bata sama pananglit sa pagsulti ‘ nganong di man ka parehas sa imong maguwang, pilde gyod ka pirmi sa atong silingan o mas maayo pa imong ig-agaw kay kugihan o utukan.
Diri magsugod ang pagkawala sa kumpiyansa sa kaugalingong sa mga bata kay kini numero 1 nga makapa-insecure. Bisan pa man og maninguha kini nga molambo, mawad-an na kini og gana nga manglimbasog kay wa na may motuo o mosalig sa iyang katakos.
Ang pagkumparar sa managsuon moresulta sa kompetensiya busa dapat patas ang dinad-an sa tanang mga anak ug way paborpabor kay lahi-lahi man og utok, talento ug katakos ang kada bata.
Bantayi o hinayhinay intawon nga di malitok kining mga pulong-abuso sama sa ‘pisting yawa, atay, hinampak, inutil, buang' ug uban kay makapasakit ug modulot kini sa huna-huna ug kasingkasing sa bata unya madala kini bisag sa ilang pagkatulog maong damanon ug damguhon og bati.