MANAY, Davao Oriental -- Dead on the spot ang usa ka giingong binabaye human pusila sa wala pa mailhing mamumuno samtang kini nagmaneho sa iyang motorsiklo alas 10:45 kagahapon sa buntag, Abril 1, 2022.

Giila sa Manay Municipal Police Station ang biktima nga si Danilo Lumikid Jr. alyas Donnie, kinsa sa maong takna nagmaneho sa iyang motorsiklo ug gilayong gipusil sa mingaw ug likuon nga dapit.

Sa pakighinabi sa Superbalita Davao sa imbestigador sa hitabo nga si Police Senior Master Joselito Gomera nga usa ka binabaye ang biktima kinsa gikompirma niini nga kanhi nidagan pagka-kagawad sa munisipyo sa Manay ang biktima sa nakalabay nga eleksiyon.

"Nilansar ning biktima pagka-kagawad sa munisipyo last election, usa ni siya ka miyembro sa LGBTQ, diin dili pa nato maingon nga usa siya ka vlogger subay sa mga giingon nilang vlogger kuno, naga-post post lang ni siya aktibo kaayo sa posting," ingon ni Gomera sa Superbalita pinaagi sa telepono.

Dugang sa imbestigador nga dili pa nila matumbok ang anggulo sa krimen, diin kagahapon gilayong mihimo og blocking sa kadalanan pinaagi sa hugot nga checkpoint ang tulo ka istasyon sa kapulisan palibot sa nahitaboan sa krimen didto sa Purok 10, Barangay Central, Manay, Davao Oriental.

"After sa krimen, dali dayon nga naghimo og blocking forces pinaagi sa hugot nga checkpoint ang tulo ka mga municipal police stations, di pa gyod to makalayo ang perpetrators," ingon ni Gomera.

Usa ka hot pursuit operation karon ang gihimo sa Manay police aron maila ug masikop ang responsable sa krimen.