Dalaga nga niduaw sa iyang amiga nga piniriso gipusasan human nasakpan nga nisuway sa pagpalusot og shabu sa alas 6:00 sa Huwebes sa gabii, Marso 31, sa Liloan Municipal Police Station sa Brgy. Jubay, lungsod sa Liloan.
Ang suspek giilang si Charlene Gonzalez Albon, 27, dalaga, taga Purok Uno ug Dos , Brgy. Cogon, lungsod sa Compostela.
Si Police Major Ramil Morpos, hepe sa Liloan Police Station nga nahinabi sa Superbalita Cebu, nagkanayon nga si Albon nibisita sa iyang higala nga si Janine Yrog-irog, kinsa nadakpan gumikan sa pagpamaligyag drugas.
Si Morpos nibutyag nga dihang gi-inspection sa ilang jailer ang mga nadawat sa mga piniriso, nasuta nga ang drugas gisulod sa lotion. Kini usa ka medium size nga putos, nga giubanan og unom ka linukot nga aluminium tin foil.
Ang drugas nitimbang og singko gramos, mobalor og P34,000.
Si Albon nanghimakak nga iyaha ang drugas kay gisugo lang siya sa paghatud sa lotion sa iyang amiga.
Gibutyag ni Morpos nga si Albon nabilanggo niadtong 2020, sa Danao City Jail gumikan sa kasong pagpamaligyag illegal drugs.
Kini maoy ikaduha nga higayon nga babaye nasikop sa Liloan Police Station nga nibisita nga nagdalag drugas.
Si Maria Ann Ferrer, 39, dunay kapuyo, taga Purok Acasia, Sitio San Lorenzo Brgy. Jubay, lungsod sa Liloan, nasikop niadtong Marso 14, 2022.
Si Ferrer nipalusot sa tulo ka putos sa gituohang shabu nga gisulod niya sa underwear alang sa iyang kapuyo nga nabilanggo. Gibalhug dayon siya sa prisohan.