Mga menor de edad ug mga hamtong na nga wala moabot sa 4 feet ang gitas-on, dili tugotan nga maka sulod sa Cebu City Sports Center atol sa political rally ni Senate President ug vice presidential candidate Vicente Sotto III karong gabii, Abril 2, 2022.
Ang campaign rally gituohan nga dugokon sa daghang mga tawo tungod sa pasundayag sa daghang artista, naglakip sa casts sa Eat Bulaga.
Matod ni Police Lieutenant Colonel Wilbert Parilla, deputy director for operations sa Cebu City Police Office (CCPO), nga ilang nasabutan uban sa organizers nga estrikto nila kini nga ipatuman nunot sa awhag sa Emergency Operations Center (EOC).
Peligro ang mga bata, ug mga hamtong nga wala moabot sa 4 feet ang gitas-on, tungod kay kon adunay tinukmoray, sila ang unang mayatakan.
Wala mo-discriminate ang kapulisan, matod ni Parilla, tungod kay igo lang sila nga nangandam aron malikayan ang nahitabo niadtong Arat na Cebu concert.
“Kadtong dili kaabot og 4 feet dili gyud nato pasudlon o less than 4 feet, bisag dili menor de edad basta dili kaabot og 4 feet naa tay limitation,” matod ni Police Lieutenant Colonel Wilbert Parilla.
Ang mga pulis nga magbantay sa entrance magdala’g tape measure kay kon adunay makita nga kadudahan ang gitas-on, sudkon kini kon nakaabot ba og 4 feet nga height.
Samtang gidili usab ang pagdalag backpack, bottled water ug mahait nga hinagiban.
Duha ka entrance gate ug exit ang gimontar. Kini nahimutang sa atbang sa Abellana Police Station ug ang usa sa J. Alcantara Street, atbang sa Elizabeth mall.
Giangkon ni Parilla nga naleksyon sila niadtong Arat concert, diin ang entrance gibutang nila sa ganghaan sa sports center nga ang resulta nag dinuotay na ang mga tawo.
Abli na usab kini sa ala una sa hapon ug kon makita nga napuno na, sirad-an na kini sa kapulisan.
Giawhag usab ang mga mosaksi sa political rally nga magsul-ob kanunay sa ilang facemask sanglit hugot nila nga ipatuman ang health protocol.
Gipaabot sa mga organizer nga moabot ngadto sa 25,000 pataas ang mga tawo nga mosaksi tungod sa mga artista sa Eat Bulaga gikan sa kaulohan nga mopasundayag.
Kompyansa si Parilla nga dili na mahitabo ang insidente niadtong miaging Sabado sanglit ila na kining gipangandaman pinaagi sa rehearsal sa security.
Ang Arat na Cebu concert gidagsa sa daghang mga tawo nga tungod niini nakurat ang kapulisan sanglit wala sila magtuo nga ingun niadto kadaghan ang mosaksi.
Moabot sa 700 ka security personnel ang giandam karon, 246 niini mga pulis, inabagan sa Bureau of Fire Protection, City Disaster Risk Reduction and Management Office ug civilian volunteers.