Mga most wanted person sa Sugbo ug Bohol nadakpan sa gilusad nga managlahing operations sa Police Regional Office (PRO 7) sa managlahing mga dapit.
Unang nadakpan mao si Arthur Dumapias, taga Barangay Canlambong, lungsod sa Dimiao, probinsya sa Bohol pinasikad sa warrant of arrest nga giluwatan nilang Presiding Judge Patsita Sarmiento Gamutan sa Regional Trial Court (RTC) Branch 51 sa lungsod sa Carmen, Bohol ug Presiding Judge Prince Joses Lim sa Municipal Circuit Trial Court Branch 11 sa Valencia alang sa mga kasong murder ug frustrated murder.
Si Dumapias nabutang sa ikaduha sa listahan sa most wanted sa Bohol.
Siya nadakpan sa mga sakop sa Damiao Police Station inabagan sa kapulisan sa Imus sa Malagasang 2A, Imus, Cavite alas 12:20 sa Miyerkules sa udto sa Marso 30, 2022.
Samtang ang Loboc ug Anda Police Station uban sa Anti-Kidnapping Group Visayas Field Unit ningdakop sa ikaunom nga nga most wanted person sa probinsya sa Bohol pagka alas 4:15 sa hapon sa Marso 30, 2022.
Ang nadakpan giila nga si Juanito Saranza, taga Barangay Balcony, lungsod sa Anda.
Si Saranza adunay standing warrant of arrest sa tulo ka mga kaso nga kalapasan sa Section 5 sa Republic Act 7610 kun Special Protection of Children Against Abuse, Exploitation and Discrimination Act nga giluwatan ni Executive Judge Samuel Biliran sa RTC Branch 50 sa Loay, Bohol.
Sa Barangay 3, lungsod sa Siaton, Negros Oriental, nadakpan usab ang number 1 most wanted person sa dakbayan sa Sugbo atol sa hiniusang operation sa Criminal Investigation and Detection Group Negros Oriental field unit uban sa kapulisan sa lungsod ug sa Cebu City Mobile Force Company ug Regional Intelligence Division 7.
Ang nadakpan giila nga si Ronel Laranjo Torres, taga barangay Mantuyop, lungsod sa Siaton, human nalutsan og warrant of arrest nga giisyu ni Judge Lynna Adviento sa RTC Branch 18 sa dakbayan sa Sugbo sa kasong pagpanglugos nga walay gitugot nga pyansa.
Matod ni Police Brigadier General Roque Eduardo Vega, hepe sa kapulisan sa Central Visayas, nga samtang aduna pay nag tago-tago nga mga kriminal, padayon ang ilang pagpangita niini.
“We will enforce the law without fear or favor,” matod ni Vega.
Ang matag police station gidasig ni Vega nga pangitaon ang mga pinangita sa balaod nga nagtago-tago ilabi na kadtong naa nabutang sa mga most wanted list sa tibuok rehiyon.