Usa ka magtiayon nga lumolupyo sa Barangay Cabawan, lungsod sa Maribojoc, probinsiya sa Bohol, wala na mahinayon sa pagpa-booster shots sa bakuna batok sa Covid-19 niadtong Huwebes, Marso 31.
Giapas sila sa usa ka drayber sa habalhabal ug gipahibalo nga nasunog ang ilang balay, busa daling ningpauli ang magtiayon.
Matod ni Police Staff Sergeant Felix Quibol, desk officer sa Maribojoc Police Station, nga ang panimay sa magtiayong Leticia Amacanin maoy girespondehan sa mga sakop sa bombero.
Alas 10:00 sa buntag sa naasoy nga adlaw, pagtak-op gyud sa Fire Prevention Month matag Marso, nahitabo ang sunog sa lungsod.
Dugang ni Quibol nga milanat og 20 minutos una pa nadeklarar nga fire out ang sunog. Ang sunog sa balay sa magtiayong Amacanin nidanyos og P80,000.
Nasayran nga layo sa kinapusoran sa lungsod ang Barangay Cabawan tungod kay anaa sa bukiran nga bahin.
Ang bombero padayon pa nga naimbestigar sa hinungdan sa pag-ulbo sa sunog sanglit wala ang magtiayon dihang miulbo ang kayo.