Ang akong mga kauban sa mountain biking lagyo na kaayo og mga rota. Hayan gipul-an na sila sa kabukiran sa Balamban, Danao, Asturias ug Toledo, naabot na sab sila og San Fernando. Igo ra ko nag-monitor sa ilang mga rota kay lisod na kaayo apson ang ilang kusog ug resistensya.
Gawas nga lisod sa akong oras, sukad ko naigo sa eczema, di na ko makapataka og dugay sa pagbuwad sa adlaw. Akong nabantayan nga dali ra kong mamuwa. Kadto ganing didto kog farm sa kape sa Tuburan, nag sunburn ang akong ulo. Grabe ka hapdos.
Kon makasikad tingali kog balik, diha ra ko sa kabukiran nga matawag namo og “playground.”
Apan nalipay ko nga human sa atoang pag-antos sa coronavirus disease, duna nay giorganisar nga mga downhill competition. Sa akong na-monitor sa Cycling Cebu Facebook, dunay giandam nga rota alang niini sa Oslob.
Nindot unta kaayo kon dunay dagkong mga kompaniya nga andam mo sponsor og mga lumba sa mountain bike, cross country ug downhill. Kon naa pa, nindot unta kaayo og padulngan ang MTB community. Apan wa pa mahitabo nga dunay dagko ug gisustener nga support.
Mao nang nakadayeg kaayo ko aning mga lider sa biking community sa Sugbo kay migasto sa kaugalingong kwarta ug kahago.
SUPORTA
Anytime motan-aw ko sa mga kompetisyon sa gawas, diha nako nakita ang suporta sa dagkong mga kompaniya nga tig manufacture og biseklita ug components. Mga batan-on pa kaayo sila, duna nay sponsors sa ilang mga training ug trips abroad.
Kini ra ba untang biseklita maka compete kaayo ta ini sa abroad kon duna lang tay mga pasilidad alang sa training ug malungtaron nga suporta.
Apan ang naninguha ra intawon ang atoa rang mga atleta nga nagpagawas og kwarta gikan sa kaugalingong bulsa ug amot sa mga higala. Ingon niana ang kahimtang sa atoang paugnat sa kusog.
BATA PA
Unta, bata pa, kadtong mga dunay kaya ug hilig og biseklita, pabansayon ang mga anak nga dunay gana sa pagsikad. Sama sa mga professional athlete sa abroad, bata pa lang, gisuportahan na sa mga ginikanan nga eventually, naka develop sa abilidad sa anak ug nakakita ra og sponsors human nakadaug sa mga kompetisyon.
Naa man gyuy mga luna ang kagamhanan, di ba kaha maayo nga mohimo og mountain bike park aron ang mga mahiligon sa mountain biking maka-develop sa abilidad. Importante kaayo ni aron madiskobre ug mapalambo ang mga bata nga duna nay abilidad sa biseklita.
Dako usab ni og tabang sa kampanya sa kagamhanan batok sa illegal drugs kay malingaw na man ang mga batan-on sa pagsikad. O maengganyo sila sa mountain biking.
Kon bata pa lang magsugod na sa trail riding ug makagiya alang sa pagbansay, di layo ang kahigayunan nga makadiskobre ug makapalambo ang Sugbo og maayong laki sa downhill ug cross country races.