Makasaysayanon karong adlawa. Mibuto ang pag-alsa sa mga Sugboanon pinangulohan ni Leon Kilat batok sa mga Katsila kaniadtong Abril 3, 1898. Tipik kini sa kaagi sa Sugbo kaniadtong Rebolusyon sa Pilipinas.
Nagmadaugon kita batok sa mga kolonyalistang Espanya. Usa kini sa atong mga kaagi nga kitang mga Pilipino mapagarbuhon.
Sukad niadtong higayona, daghang mga negatibo ug mga positibong hitabo sa atong kasaysayan.
Lakip niini ang pag-ilog sa atong kadaugan batok sa kolonyalistang Espanya sa Estados Unidos ug ang ikaduhang gubat sa kalibotan.
Grade 5 ko dihang gideklarar ni Presidente Ferdinand Marcos ang balaod militar nga naghimo niyang usa ka diktador pag 1972 hangtod gipalayas siya sa katawhang Pilipino sa pag-alsa sa Edsa kaniadtong 1986.
Subo lang kay nibalik kita sa politikanhong demokrasya, wala makab-ot ang ubang angay untang reporma aron kita molambo.
Pananglitan, gipakgang sa mga agalong yutaan ang pagpakanaog og tinuod nga reporma sa yuta. Bisan og nakasulay kita og mga ligdong nga presidente, wala gyud mapapas ang pangurakot.
Gani, ang nangaprisong mga dagkong kurakot gipangbuhian na man hinuon ni Presidente Rodrigo Duterte.
Alang kanako, duna kitay higayon nga mausab ang dagan sa atong kasaysayan karong Mayo 9, 2022. Kana kon dili kita mopili og kawatan isip presidente.
Dasig
Dinhi sa Probinsya sa Sugbo, angay gyud tarungon ni Gob. Gwen Garcia kining iyang Dasig Cards. Kay bisan pa og di kini himuong isyu sa politika, liboan karon ang mga biktima sa bagyong Odette ang nangasuko tungod niining Dasig Cards.
Unsaon, kay nganong uwahi na gani ang pang-apod-apod sa ayuda, di na kwarta ang gipanghatag, wa pa gyuy pundo.
Di katuohan ang rason nga ang kalangay tungod sa burukrasya maoy nakaingon. Di makasabot niana ang mga kabus nga anha na mangatulog sa gawas sa mga mall ug hardware aron lang magamit ang Dasig cards.
Kiko o Tito
Si Senate President Tito Sotto ang bida sa dakong kalihokan sa Bando Osmeña-Pundok Kauswagan (BOPK) kagabii. Silang duha ni Bise Presidente Leni Robredo.
Gikinahanglan kini ni Tito kay sa miaging semana gihapak ang iyang kandidatura uban ni Sen. Ping Lacson sa paghawa gikan sa ilang han-ay sa Partidong Reporma ni kanhi House Speaker Bebot Alvarez kay nibalhin kini kang Robredo.
Dayon misamot pa gyud pagsaka ang kandidatura ni Robredo sa pagtumaw niining ROSA. Mao kini ang kalihokan nga nagduso sa pagparis nilang Robredo ug Davao City Mayor Inday Sara Duterte-Carpio.
Nakadani kini sa mga mayor ug gobernador nga loyal kang Inday Sara apan nagduha-duha nga mosuporta kang kanhi senador Bongbong Marcos. Sa akong tan-aw, nakapahuyang sab kini kang Inday Sara.
Alang kanako, ang paghawa sa Reporma kang Tito ug ang pagtumaw sa ROSA nakahatag karon og kahigayonan sa pagsulbong ni Sen. Kiko Pangilinan.
Nakahinumdom pa ko sa piliay sa 2010 dihang nahagsa ang kampanya ni Manny Villar. Gigamit ni Jojo Binay ang kahimtang sa pagsulbong. Hinuon, depende kini kang Kiko karon. (DM nako @anol_cebu)