Kapulisan ug traffic authorities nakugang sa kadaghan sa mga tawo nga nanambong sa dungan, apan managlahi nga rally sa Barug-PDP Laban nga gipangulohan ni Mayor Michael Rama ug sa iyang runningmate, Konsehal Raymond Alvin Garcia, sa Biyernes sa gabii, Abril 1, 2022.
Kay ang mga dapit nga gipahigayunan duol ra kaayo sa karsada, nakamugna kini og gamay nga kahuot sa trapiko.
Apan matod sa Cebu City Transportation Office (CCTO), mapaabot kini tungod sa pagdagsa sa mga tawo sa tanang mga dapit nga gihimoan sa rally.
Gawas sa mga sakyanan, daghan usab nga mga tawo nga naglakaw sa kadalanan.
Gibana-bana sa kapulisan nga di mominus sa 25,000 ka mga tawo ang ningsalmot sa rally nga gipahigayon sa walo ka mga dapit sa dakbayan.
Sa south district, kini gipahigayon sa Brgy. San Nicolas, Tisa, Guadalupe, ug Pardo
Sa north district, gihimo kini sa Brgy. Lahug, Talamban, Tinago ug Cogon Ramos.
Bisan sa pagdasok sa mga tawo, si Police Lieutenant Col. Wilbert Parilla, deputy director for operations sa Cebu City Police Office (CCPO), niingon nga malinawon sa kinatibuk-an ang kalihukan.
Matud ni Parilla nga 120 ka mga pulis ang ilang gipakatap sa kinatibuk-ang kalihukan.
“[We have] uniformed personnel. Kadtong dagko nga venue naay tag 20 ka personnel unya mga gagmaygagmay lang naay tag 15. Unom ka area nga tag 15 ka uniformed personnel unya duha ka area nga tag 20 ka pulis ang atong gibutang,”matod ni Parilla.
Duna may paghuot sa dagan sa trapiko, matod ni Parilla nga normal kini sa dagkong mga kalihukan.
“Ang traffic, normal gyud nga traffic kay duna may event.”
Samtang si CCTO head Lyntoni Alburo niingon nga nipakatap sila og traffic enforcers aron di magkayamukat ang dagan sa trapiko.
Matod niya nga ang organizers sa nahisgutang kalihukan nangayo kanila og permit, busa gibutangan kini nila og enforcers.
Mokabat sa 55 ka traffic enforcers ang ilang gipakatap.
“Actually ang gibuhat gyud nato nikuha na sila og permit sa atong office noh. Gideployan nato og personnel. Gi-man nato ang traffic but as to transportation, wala gyud problema. Pero ang mga tawo nga baga lang gyud kaayo, maglisod gyud ta og control but still ato man gyud na manage. Dili lang gyud na kalikayan sa ingon ani nga panahon,”matod ni Alburo.
Wala usab magdahum ang CCTO sa ingon ato ka daghan ang bul-og sa mga tawo nga nanambong sa rally, dugangan pa sa mga tawo nga naglakawlakaw pa sa dalan.
“Pasensiya lang gyud sa ta gamay. Anyway dili man ni permanente. Naa man gyud mga adlaw nga ingon ana. Hinaut nga makasabot lang ta,” nagkanayon si Alburo.
Iyang giawhag ang publiko sa pagsunod sa ilang Facebook page alang sa traffic advisories aron sila makapangandam kon dunay mga lakaw.
Ang rally gipahigayon human usab sa grand rally sa PDP-Laban sa dakbayan sa Lapu-Lapu niadtong Huwebes sa gabii nga nilanat hangtod sa Biyernes sa kaadlawon.
Si Presidente Rodrigo Duterte ning-isa sa mga kamot nila ni Rama ug Garcia timaan sa iyang pag-endorso.
Lakip sa giisa ang mga kamot nila ni Gobernador Gwendolyn Garcia ug sa iyang runningmate nga si Dr. Dr. Maria Theresa Heyrosa.
Giindosar usab sa Presidente ang mga kandidatura nila ni Mandaue City Mayor Jonas Cortes ug Mayor Junard “Ahong” Chan sa dakbayan sa Lapu-Lapu.
Kagabii, Sabado, mipahigayon usab og ilang grand rally ang Bando Osmena Pundok Kauswagan (BOPK) sa Cebu City Sports Center.