MAS gikalipay karon sa mga motorista labi na sa mga makonsiderang mga "Bayaning Tsuper" human nga magduha ka semana nang wala misaka ang presyo sa mga nag-unang petroleum products sa nasud.
Alang sa usa ka drayber sa Southbay Toda Association (Sotoda) sa Agdao District, Davao City nga mas nalipay siya human nga magduha ka semana nang wala mitaas ang presyo sa lana.
"Makadala na gyod mi'g pamalit bugas sa balay, wala naman nitaas, malipay ta kung ingon niini ang sitwasyon, pero basin moabot napod ang pipila ka adlaw gikan ron, sulbong napod," saysay ni Freddie Gorgonio, taga IKP, Southbay, Barangay Lapulapu, Agdao ning dakbayan.
Human sa ika-11 nga sunod-sunod nga pagsaka sa presyo sa petrolyo sukad tuig 2022, sa miaging duha ka semana palang nabati ang unang rollback sa presyo sa lana.
Kini subay sa sunod-sunod nga pagtaas nga miabot na sa P76 matag letro, apan mi-rollback gihapon kini sa P69 ug dunay P71 magdepende sa gasolinahan.
Kulang sab suma pa ang ayuda sa gobyerno nga Pantawid Pasada Programa alang sa mga tsuper.
"Kulang kaayo oi, pero at least nakahimulos ta bisan gamay, dapat naa pa'y programa ang gobyerno nga pang-long term ba," ingon sa drayber og dyip nga si William Baldos, nga taga Barangay 31-D, Davao City.
Mipadayag sab og halapad nga panglantaw ang grupong Bayaning Tsuper Partylist (BTS) diha sa mga maayong plano niini alang sa mga makonsiderang mga "Bayaning Tsuper".
Si Bayaning Tsuper Partylist (BTS) first nominee Atty. Alex Abaton gilayong mihangop sa mga mulo sa mga drayber ug mga operators diin nauna nang nakigtagbo sa mga nahisgutan sa Davao City aron hisgutan ang maayong solusyon sa suliran.
Sumala ni Abaton nga dunay remedyo nga pagahimuon aron dili maipit sa maong suliran ang mga yanong drayber.
Sa naunang pamahayag sa BTS, "Kailangan ang isang kongkreto na plano, isang kongretong benepisyo na hindi panandalian, kun di pangmatagalan para sa mga bayani nating mga tsuper; bigyan natin ng sapat na benepisyo at ayuda... kung may suliranin tayo lalo na sa pagtaas sa presyo ng gasolina, kailangan din na may pagkukunan ng sapat na panggastos ang ating mga tsuper," pung ni Atty. Abaton sa Superbalita.
Subay sa domestic oil price advisory nga gipagula sa Department of Energy (DOE), sugod niadtong Marso 8, 2022, dunay estimated price adjustment diin ang gasoline +P3.60/L, ang diesel dunay +P5.85/L, samtang ang kerosene naa sa +P4.10/L, apan daw nabawi lang kini nga umento human sa usa ka bigtime rollback sa milabay nga duha ka semana.
Tungod niini ang DOE nangita og temporaryo nga mga relief measures sa pagbatok sa posible nga impak sa padayong pagsaka sa presyo sa mga petroleum products.