DEAD on the spot ang usa ka 80-anyos nga lola human nabanggaan og sakyanan sa pagtabok niini sa kalsada Dominggo, April 3, 2022, didto sa Kilometro 6, Carlos P. Garcia Highway, atubangan sa Purok Mahayag Buhangin, Davao City.
Giila sa kapulisan ang biktima nga si Ursina Gultiano Pagaran, residente sa Purok Mahayag, Buhangin, Davao City.
Aksidenteng nadasmagan si Pagaran sa usa ka Toyota Hi-ace, kolor itom nga dunay plate number UIY 640 ug nakarehistro ubos sa pangalan ni Joel T. Credo. Gimaneho kini ni Jevannie Sajorga Delos Santos, 41, residente sa Skyline, Phase 3, Catalunan Grande, Davao City.
Sumala sa drayber nga wala niya nabantayan ang pagtabok sa edaran, butang nga nadumbulan kini sa gimaneho niini nga sakyanan ug maayong pagkabagnos sa biktima sa kalsada nga maoy hinungdan sa hinanali niining kamatayon nga gideklara sa Central 911-Cabantian.
Gidala ang patay nga lawas sa biktima sa usa ka lokal nga punerarya ning siyudad samtang ang drayber ug ang sakyanan temporaryo nga gikustodiya sa Buhangin Police Station.
Pasakaan og kaso Lunes ang drayber didto sa korte sa kalapasan sa reckless imprudence resulting to homicide.