Sa makausa pa, ang GerryPens Promotions ni kanhi world boxing champion Gerry Penalosa, makigtambayayong na usab sa Philippine Amusement and Games Corporation (Pagcor) ug sa Bingo Plus alang sa laing boxing promotion nga gikatakda karong Mayo 28, 2022.
Wa pa man tuod matino ang venue apan gibutyag ni Penalosa nga tulo ka mga dapit ang iyang gipilian karon alang sa maong promotion diin lakip na niini ang Cebu.
Ang Laguna ug Manila maoy laing duha ka mga lugar nga gipanglantawan sa sa kanhi two-time division champion.
Sa maong promotion, malisod nga dalan ang latason sa wa pay pildi nga si Criztian Pitt Laurente batok sa beteranong Marco Demecillo sa main event.
Si Kenneth Llover mosuway pagsumpay sa iyang upat ka sunodsunod nga daog ug wa pay pidi batok ni Mervin Lulu (5-5-2) sa supporting main bout.
Kon kahinumdoman, niadtong Pebrero 5, 2022, si Laurente gikatakda na untang makig-away ni Vicente Casido sa main event sa Bangon Cebu boxing promotion sa Bogo City, Cebu nga gipaluyohan sab sa Pagcor ug Bingo Plus.
Apan kini nahimong kontrobersiyal human ang ring physician nga si Dr. Jose Unabia wa motugot nga mosaka sa ring si Laurente sa rason nga aduna siyay nakita nga deperensiya sa panglawas ni Laurente.
Hinuon ang Laurente-Casido fight nahinayon sa Sanman Gym sa General Santos City niadtong Pebrero 26, 2022 diin gi-knockout ni Laurente si Casido sulod sa duha lang ka rounds.
Gibutyag ni Penalosa nga gawas sa away sa Laurente-Demecillo bout ug Llover-Lulu fight, aduna pay laing mga parisan nga nakahan-ay nga modugang sa kaikag sa promotion.