Gilauman nga makaduwa og balik sa Brgy. Ginebra Gin Kings si Japeth Aguilar sa finals series sa Philippine Basketball Association (PBA) Governor’s Cup batok sa Meralco Bolts nga sugdan karong Miyerkules, Abril 6, 2022.
Apan wala’y kaseguroan kon asa nga punto sa best-of-seven championship series makabalik si Aguilar.
“We expect Japeth to come in at some point in the finals but we don’t know when,” pasabot ni Gin Kings coach Tim Cone.
Wala nakapakita og aksyon si Aguilar sa mayorihiya nga bahin sa playoffs gumikan kay nagpaalim kini sa iyang angol (calf).
Katapusang nakaduwa si Aguilar sa Game 1 pa lang sa semi-finals series diin mingdaog ang defending champions batok sa NLEX Road Warriors, 3-1.