Sama sa gilauman, grabe ka inilog si Japanese Naoya “Monster” Inoue sa ilang panagsangka og balik ni Nonito “Filipino Flash” Donaire karong Hunyo 7, 2022 sa Saitama Super Arena sa Japan.
Si Inoue, kinsa midaog pinaagi sa unanimous decision human sa grabe nilang binukbokay ni Donaire niadtong Nobiyembre, 2019, napatik sa oddsmaker sa -400 samtang si Donaire natali sa +300.
Nagpasabot kini nga ang $400 nga pusta ngadto kang Inoue igo lang modaog og $100 samtang ang $100 nga pusta kang Donaire modaog og $300.
Sa ikaduhang panagsangka sa top two bantamweights sa kalibuta, mas dako ug mas mahinungdanon ang pagailugan gumikan kay usa kini ka three-belt unification bout.
Isugal ni Inoue ang iyang World Boxing Association (WBA) ug International Boxing Federation (IBF) bantamweight titles samtang isugal ni Donaire ang iyang World Boxing Council (WBC) belt.