Lumad nga taga Barangay Santo Niño, dakbayan sa Pagadian sa Zamboanga del Sur apan temporaryong nagpuyo sa Barangay Tayud, lungsod sa Liloan, ang naposasan human nakuhaan og 200 gramos nga shabu atol sa anti-illegal drug operation sa kapulisan sa Dominggo, Abril 3, sa kaadlawon.
Si Police Major John Philip Libres, hepe sa Opao Police Station sa Mandaue City Police Office (MCPO), maoy nangulo sa pagpangronda nga miresulta sa pagkasikop sa suspek.
Ang dinakpan nailhan nga si Bernabe Jabon, 43, taga Pagadian City, kanhi truck boy ug sa dihang naundang sa trabaho, namaligya og shabu.
Sa gihimong pagpangronda, nasakmit gikan kang Jabon ang gituohang shabu nga moabot ngadto na sa 200 gramos, apil na kadtong napalit nga usa ka bulto nga maoy gipalit sa nagpailang poseur buyer.
Gibanabana nga moabot sa P1.3 milyunes nga balor sa shabu ang nasakmit subay sa street drug price niini.
Matod ni Libres, si Jabon usa mga tigsuplayan sa usa ka Ramil Mandin nga nadakpan na sa mga operatiba didto sa Barangay Paknaan sa dakbayan sa Mandaue.
Nasayran nga si Jabon gikonsidera sa kapulisan nga provincial high value individual tungod sa iyang gilapdon sa pagpamaligya og drugas.
Ang dinakpan sa iyang pamahayag, miangkon sa iyang pagkalambigit sa pagpamaligya og drugas human kini mawad-an og trabaho isip truck boy.
Ang dinakpan miabot sa Sugbo gikan sa Pagadian City sa milabay nga tuig dihang gidala kini sa iyang silingan nga usa ka engineer kay gipa-welding sa gate sa balay sa maong engineer dinhi sa Sugbo.
Ug sa pagkahuman, wala na mouli tungod kay nakakita og trabaho hangtud nga nakakita og kapuyo nga maoy iyang kauban karon, hangtud nga nakailaila og kauban niini nga namaligya usab ug shabu ug mao na kini ang iyang negosyo.