Ang kontrobersiyal nga waste-to-energy project sa Cebu City Government abli na karon alang sa ‘swiss challenge’ human ang konseho sa dakbayan nipasar sa resolusyon nga nagtugot kang Mayor Michael “Mike” Rama sa pagpirma sa usa ka Joint Venture Agreement (JVA).
Mao kini ang gibutyag ni City Councilor Raymond Garcia sa Sabado, Abril 2, 2022.
Matod ni Garcia, ang interesado nga third-party company makasumitrer og proposal sa paghagit sa orihinal nga tanyag sa New Sky Energy Philippines Inc.
Sa ilang website, ang Government Procurement Policy Board (GPPB), nagkanayon nga ang usa ka swiss challenge, “initiated by an unsolicited proposal or when the original proponent makes an offer to the government without any formal or informal request from the former.”
Ang GPPB nagkanayon nga pagtugot sa tanyag sa third parties sa pagseguro o pagsukod sa orihinal nga tanyag nga mas labing maayo nga kasabotan nga sudlan sa siyudad.
Sumala ni Garcia, ang kagamhanan sa dakbayan naglatid sa tagal nga 30 ka adlaw sa pagdawat sa hagit alang sa proyekto.
Kon walay mohagit, matod ni Garcia, ang dakbayan mopadayon sa iyang tanyag sa proyekto.
Hinuon, kon dunay hagit, ang GPPB mohatag og katungod sa original party sa paghimo og “counter-match any superior offers given by the third party.”
Ang konseho niaprobar sa resolusyon nga nagtugot sa mayor sa paglagda sa JVA niadtong Marso 2.
Apan wala pa molihok si Rama, 10 na ka adlaw human sa pagdawat sa resolusyon niadtong Marso 16 nga naghimo nga ‘approved by inaction.’
Sa linaing pakighinabi, si Rama nagkanayon nga nagpaabot siya sa resulta sa swiss challenge sa dili pa mopirma sa JVA sa proyekto.
Daghang nipadayag sa pagsaway sa proyekto.
Ang proponent o nagsugyot nga kompaniya buot mookupar sa unom ka ektaryang luna sa kagamhanan ug nag-require sa kagamhanan sa paghatod sa 800 tons sa basura sulod sa 49 ka tuig.