Malinawon ang caravan sa dakbayan sa Carcar nga gitambongan og dili mominos 10 mil ka tawo niadtong Sabado sa buntag, Abril 2, 2022.
Mao kini ang assessment ni Police Lt. Col. Ardioleto Cabagnot, hepe sa Carcar Police Station nga nahinabi sa Superbalita Cebu.
Dugang nga hapsay ug malinawon ang caravan nga natapos sa alas 2:00 sa hapon ubos sa pagpangulo ni Bise Mayor Nice Apura ug mga konsehal.
Gipadayag niini nga ilang mga personnel sa kapulisan, sa traffic mihimog mga lakang sa pagpahigayon sa rerouting sa ubang rota nga naigo sa caravan.
Gani, sayo pa sa buntag, moabot na sa 4-5 mil ka tawo ang diha sa ilang tagsa-tagsa ka sakyanan alang sa maong kalihukan.
“Malinawon ang kalihukan, dunay ubang area nga natrapik daghan gyud kaayo ang mitambong sa caravan,” dugang ni Cabagnot.
Si Bise Mayor Apura nangayo og despensa sa mga motorista nga natanggong sa trapiko atol sa ilang caravan.
Gipadayag ni Apura nga ubay-ubay gyud ang miduyog sa ilang kalihukan.
Sa ilang listahan, ang misalmot 621 ka chappy o traysikol, 768 ka habal-habal, 389 ka pribadong sakyanan.
Dunay mga dagkong truck nga nagkarga og daghang tawo sa caravan
Sumala ni Apura, nga wala sila magdahom ingon ato kainit ang suporta sa kadaghang nanguyog hinungdan nga nagpasalamat sila niini.
Gitug-an niini nga nidoble ang nikuyog sa maong caravan nga niabot sa 10 mil ka mga tawo gikan sa nagkalainlaing barangay.