Kritikal ang usa ka amahan human dunggaba sa anak tungod sa kasuko sa naulahi dihang gibaligya ang iyang manok igtatari.
Ang pagpanunggab nahitabo sa Sitio Casino, Barangay Tuba, lungsod sa Dalaguete niadtong Sabado, Abril 2, alas 10:30 sa gabii.
Ang biktima nga amahan giila sa kapulisan nga si Joventino Chavez Manila, 50, ug mag-uuma nga nakaangkon og samad dinunggaban sa tuong tiyan.
Ang anak nga suspek nisibat human sa hitabo mao si Jessie Gerodias Manila, 21, ulitawo ug construction worker.
Si Police Executive Master Sgt. Jorame Tanudtanud, imbestigador sa Dalaguete Police Station nga nahinabi sa Superbalita Cebu, nagkanayon nga ang suspek hubog nga naabot sa ilang panimalay.
Nagkalalis sa iyang amahan human ang iyang manok igtatari gibaligya niini.
Sa kasuko sa suspek, mikuha kini og plamingko ug gidunggab ang iyang amahan.
Atol ning pagsuwat, kritikal ang kahimtang sa amahan nga gidala sa Vicente Sotto Memorial Medical Center sa dakbayan sa Sugbo tungod sa pagkahabwa sa tinai.
Ang anak nahugno dihang wala na iyang manok human gipalit sa silingan ug giihaw busa dili na niya malukat.
Giandam na sa kapulisan ang kasong frustrated parricide batok sa suspek.