Asawa nasakpan sa bana ug kapulisan nga nagdulog uban sa batan-ong lalaki sa lawak sa usa ka balay sa Sitio Luknay, Barangay South Poblacion, lungsod sa San Fernando, alas 11:30 sa buntag, Dominggo, Abril 3, 2022.
Gipusasan si Magda (dili tinuod ngalan), 35, minyo ug taga Purok Orchid, Barangay Balungag, San Fernando.
Lakip sa gipusasan ang iyang kabit nga batan-on si Clark Anthony Pasco Olmuquez, 23, ulitawo, kanhi trabahante sa usa ka dakong kompaniya sa dakbayan sa Lapu-Lapu ug taga Sitio Luknay, South Poblacion, San Fernando.
Si Ariel (tinuod ngan gipugngan), 42, construction worker ug taga Purok Orchid, Barangay Balungag, lungsod sa San Fernando, nangayo og abag sa kapulisan human niya nasubay iyang asawa.
Si Police Staff Sgt. Paul Baclay sa San Fernando Police Station nga nahinabi sa Superbalita Cebu, nagkanayon nga ang biktima nga bana nipahibalo nga ang iyang asawa nga nawala sulod sa upat ka adlaw ug iyang nakit-an nga niuban diay sa batan-ong lalaki.
Sa pag-abot sa mga pulis ug bana sa balay, naaktuhan ang duha nga nagdulog busa gipangpusasan dayon.
Matud ni Baclay, ang batan-ong lalaki mitug-an nga ang iya untang uyab ang pag-umangkon ni Magda.
Dihang nakit-an niya sa Facebook sa iyang selpon, midayeg siya nga guwapa ang iyaan ug ang uyab sa lalake nipadayag nga “kamo na lay uyab sa akong auntie,” sumala sa pakisusi sa kapulisan.
Gumikan niini, nagkasuod ang duha ug pinaagi sa selpon, nagkauyab sila.
Dihang nipauli ang lalaki sa San Fernando, nagtaban ang duha ngadto sa balay sa lalaki naa sa samang lungsod.
Ang bana nga nahinabi sa Superbalita Cebu, nagkanayon nga ang iyang asawa nabantayan niya pipila na ka bulan nga busy pirme sa selpon ug kon moduol kini, daling itago ang selpon hangtud nga nahibaw-an niya niadtong Martes, Marso 29, nga nilakaw iyang asawa.
Gipadayag niini, nagtrabaho siya og construction dinhi sa dakbayan sa Sugbo.
Gilipat sa iyang asawa ilang tulo ka anak nga nag-edad 21 nga lalake, 18 anyos nga babaye, ug 7 anyos nga babaye.
Nakontak nila ka usa nga naa ra siya sa dakbayan sa Mandaue sa iyang higala.
Apan ang bana nakadawat og impormasyon niadtong Dominggo sa buntag, Abril 3, gikan sa iyang pag-umangkon nga naa lang sa San Fernando ang asawa uban sa batan-ong lalaki.
“Ako na siyang gipasaylo para na lang sa mga bata, unya dili naman siya makig-uli nako, adto naman gyud daw mokuyog sa iyang lalake! Ako ipadayon pagpasakag kasong adultery,” matod sa bana.
Misuporta sa bana ang iyan tulo ka mga anak sa pagpasaka og kaso batok sa iyang asawa human ningpadayag sa ilang kasagmuyo, kauwaw sa gihimo sa ilang inahan.
Si Police Staff Sgt. Baclay nitug-an nga ang mga dinakpan nipadayag nga ilang atubangon ang kaso.
“Kining batan-ong lalaki miingon nga magpili ka, kon mouban ka sa imong bana, kaw nay bahala, pero kon ari ka nako, kuyog piyansa nimo,” dugang ni Baclay, subay sa gipamahayag sa lalaki.
Ang babaye mitubag nga adto gyud siya mokuyog sa batan-on.
Tungod niini, matod ni Baclay, ang kapulisan gikatakda nga mopasaka sa kaso batok sa duha karong adlawa, Abril 4, 2022.