MORAG layo ra sa tinuod nga maubos sa Alert Level 1 ang Probinsya sa Sugbo tungod kay, matud sa taho, 1,500 ra ka mga senior citizen ang nabakunahan batok sa Covid-19 niadtong tulo ka adlaw nga "special vaccination" sa probinsya gikan niadtong Marso 29 hangtud Marso 31, 2022.
Hinuon, duna koy pagduda nga basin iubos ra unya sa Alert Level 1 ig tungtong sa buwan sa Mayo tungod sa piliay sa Mayo 9, 2022. Apan, manghinaut lang ta sukad karon hangtud sa katapusan ning buwan sa Abril nga walay mahitabo nga pagsaka unya sa mga natakdan sa Covid-19 Omicron variant.
Gipahigayon ang tulo ka adlaw nga pamakuna sa miaging buwan sa mga dapit sa probinsya nga gamay ra ang nabakunahan sa mga senior citizen sama sa lungsod sa Balamban, Bantayan, Barili, Daanbantayan, Dalaguete, Pinamungajan, San Fernando, San Francisco, ug Tuburan, ug sa mga dakbayan sa Carcar, Danao ug Toledo.
Nganong menos ang pamakuna sa mga senior citizen ani nga dapit? Ang nakahibawo ang mga opisyales ra gyud sa nahingtungdan nga lungsod ug dakbayan sa hinungdan. Anugon kaayo ang daghan nga bakuna nga donasyon ug mga pinalit sa atong kagamhanan nga mihupas na lang kay daghan ang wa magpabakuna lakip na niini ang mga senior citizen.
Matud ni Dr. Mary Jean Loreche, ang chief pathologist of the Department of Health-Central Visayas, 585 ra ka senior citizens ang nabakunahan sa 12 ka LGUs kon 1.5 porsento sa 38,529 ka target nga senior citizen nga bakunahan matag balay sa 12 ka lungsod ug dakbayan.
Sa 38,529 nga target bakunahan nga senior citizen, matud ni Loreche, 102 ra ka senior citizen ang nabakunahan sa primero nga bakuna, 119 ang nakadawat sa ikaduha nga bakuna, samtang 364 ang nabakuhan sa usa lang ka turok sa Johnson and Johnson, nga bakuna. Ang DOH-Central Visayas nagpadala og 65 ka tawo sa 12 ka LGUs nga nanerbe sa social mobilizers.
Ang target sa DOH nga makabakuna og 40,000 ka tawo sa tibuok probinsya niadtong tulo ka adlaw nga pamakuna. Apan, 33,308 ka tawo ra ang nabakunahan, kon 83.27 porsento ra sa ilang target. Matud ni Loreche, ang 9,394 ka tawo pulos primero nga turok, samtang 12,409 ang nahatagan na sa ilang ikaduha nga bakuna. Ang nahatagan sa Johnson and Johnson 2,350 ka tawo ug dunay 4,163 nga nakadawat sa booster dose.
Matud ni Loreche, ang lungsod sa Minglanilla ang dunay daghan nga nabakunahan, 2,427; sunod ang dakbayan sa Naga, 2,308; Consolacion, 1,653; Compostela, 1,068; Cordova, 962; Poro, 528; Tudela, 289; Alcoy, 238; ug Pilar, 226.
Ang komon nga rason sa di magpabakuna, matud pa ni Loreche, mao ang ilang pagtuo nga tungod kay senior citizen na, di kinahanglan magpabakuna pa. Ang lain nga rason mao ang gilay-on sa mga dapit ngadto sa vaccination center ug kahadlok sa di maayo nga epekto unya sa bakuna nga ilang nahibaw-an sa social media. O, di ba kaha kay langayan ang mga opisyales sa giingon nga mga LGU.