KARON nga nagsingabot ang Semana Santa, di malikayan ang bul-og sa katawhan nga anaa sa mga simbahan ug ubang kalihokan nga pasiugdahan sa simbahan. Nahimo nang parte sa atong kultura isip mga Katoliko nga magpunsisok ang mga tawo kon Biyernes Santo ngadto na sa Dominggo sa Pagkabanhaw.
Niadtong 2020, napasanginlan ang mga tawo nga namalit sa Carbon Market alang sa lutuon nga binignit nga didto nagsugod ang tinakdanay sa Covid-19. Ning higayona, mamahimo na nga libreng makagawas ang mga tawo aron makapamalit sa ilang ingredients sa binignit kay anaa naman sa Alert Level 1 ang dakbayan sa Sugbo.
Apan dili sama ang masinati sa lalawigan sa Sugbo kay ubos kini sa Alert Level 2 gikan niadtong Abril 1 hangtod sa 15. Ubos sa alert level 2, daghang kalihokan ang gidid-an sama sa pamuwang unya ang mga establisemento maka-operate apan anaa lang sa 50% sa indoor venue capacity ug 70% sa outdoor capacity.
Posibleng dugay pang makab-ot ang alert level 1 sa lalawigan kay sa bag-ohay lang gihimong special vaccination days niadtong Marso 29 ngadto sa 31, anaa lang sa 1,500 kapin ang nagpabakuna sa senior citizens sa gi-target nilang 40,000. Kon moabot na sa gidaghanon nga maoy gilatid sa Department of Health ang magpabakuna sa mga senior citizen, dako ning tabang aron maangkon ang alert level 1 sa probinsiya.
Gikataho nga ang mga rason nganong daghan pa ang wa magpabakuna nila kay lagi taas naman ang ilang mga edad, wa na sila nagkinahanglan niini ug ang uban tua magpuyo sa layo nga sityo sa barangay samtang ang uban nahadlok sa “side effects” ug ang uban nagpili sa brand sa bakuna nga gusto nilang maturok sa ilang lawas.
Dako kaayo og papel niini ang atong mga lokal nga kagamhanan aron maikag ang mga senior citizen nga magpabakuna aron maangkon ang alert level 1. Angay lang nga ang mga Rural Health Units (RHU) o mga city health department maghimog mga programa sama sa pag-edukar nila nga ang bakuna alang sa proteksyon sa pamilya.
Pwede sab nga maghatag sila sa mga panginahanglanon sa mga senior citizen sama sa pagkaon, o kaha mga butang nga ilang pwede nga malingawan sama sa pag-raffle og TV, transistor radio, cellphone ubang butang nga magamit nila kon sila laayon aron lang magpabakuna sila. (josephelvirtubilan@gmail.com)