KAPULISAN sa dakbayan sa Sugbo hugot nga mibarog nga adunay pagtugot sa organizers sa kampo ni Senate President Vicente Sotto III nga kandidato pagka bise presidente sa nasudnong eleksyon sa Mayo 9, 2022, ang pagdili sa pagpasulod sa Cebu City Sports Center (CCSC) sa mga wala makaabot og 4 feet ang gitas-on labi na sa mga menor de edad.
Human giuwan og mga pagsaway ang kapulisan sa desisyon niini nga idili nila sa pagpasulod sa CCSC niadtong Sabado, Abril 2, 2022, atol sa campaign rally sa Bando Osmeña Pundok Kauswagan (BOPK) uban ni vice presidential candidate Vicente Sotto III, ang mga tawo nga wala makaabot sa 4 feet ang gitas-on gipasabot kini sa Cebu City Police Office (CCPO).
Matod ni Police Lieutenant Colonel Wilbert Parilla, deputy city director for operations sa CCPO, nga sa wala pa ang campaign rally nilang Sotto ug sa kampo sa BOPK gipatawag nila ang organizers ug ilang gihatag ang ilang plano sa seguridad.
Sa maong security conference, usa sa ilang gisugyot nga did-an ang mga mugbo nga tawo nga menor de edad nga wala makaabot og 4 feet ang height, aron malikayan ang disgrasya kon mahitabo man ugaling ang dinuotay sa mga tawo nga giuyonan usab sa organizers.
Gani human nga nag-trending kini sa social media ilang gibalik sa pagpahibawo ang organizers nga representante ni Senador Sotto kon ihinayon ba niini ang unang plano apan nipursige gyud kini nga ipadayon nga mao usab ang ilang gisunod dungan sa pagpasabot nga walay discrimination ngadto sa mga mugbo ang gitas-on.
“There’s no discrimination, ato man na nga gi-clarify og balik sa organizer nga upon learning nga dunay mga ningreklamo, ato nang gibalik sa pagpangutana sa organizer, which is ang organizer ning-approved nga ipadayon ang procedure, igo raman ta ni suggest ug igo ra sad ta nituman kung unsay gusto sa organizer,” matod ni Parilla.
Lakip sa misaway ang kanhi Comelec Commissioner Rowena Guanzon gani nagtinguha kini nga ipa-imbestigar ang kapulisan ug mopasaka og kaso tungod kay dili matod pa kini makiangayon.
Alang ni Parilla nga katungod ni Guanzon ang pagpasakag kaso ug ila kining atubangon apan subli niya nga gipahibawo nga pagbuot kadto sa organizers nga mao usab ang ilang gipatuman.
“That is her right, we will always welcome kung unsay iyang gusto investigation nga pagabuhaton,” dugang ni Parilla.
Kon ugaling ang laing political party ang mohimog campaign rally sa dakbayan sa Sugbo, ila kining ipadayon sa pagpatuman kon pagbuot sa organizers.
Sanglit nakita nila ang kaepektibo niini nga malikay sa disgrasya ang mga bata o kadtong mga menor de edad nga wala moabot sa 4 feet ang ilang height sanglit sila ang peligro nga matamakan kon ugaling adunay tinukmoray nga mahitabo.
Gihulagway ni Parilla nga hapsay ug malinawon ra ang campaign rally sa BOPK nga gitambongan usab sa mga artista sa Eat Bulaga nga mitabang sa pagkampanya sa kandidatura ni Sotto sa sa pagka bise presidente.
Ilang gipangandaman ang 25,000 ka mga tawo apan sa ilang banabana moabot lamang sa 12 ngadto na sa 13,000 ang mitambong.