USA ka drayber sa habalhabal nga hubog nanghambog sa iyang armas, nakaigo kini og usa ka menor de edad dihang nibuto.
Ang insidente nahitabo sa Barangay Batad, lungsod sa San Remigio, alas 5:00 sa hapon, Dominggo, Marso 3.
Si John Denver Cañete, 16, estudyante ug nagpuyo sa nahisgutang lugar, samdan sa iyang tiyan nga naa sa tambalanan.
Nasikop si Junel Sumanting, 33, ulitawo, drayber sa habalhabal ug taga Barangay Tambongo, San Remigio.
Nakuha sa kapulisan ang paltik .357 revolver uban sa usa ka kabhang nga bala.
Si Police Corporal Saulo Zapanta sa San Remegio Police Station nga nahinabi sa Superbalita Cebu, nagkanayon nga ang suspek hubog kay gikan sa pikas sitio mitambong sa birthday sa iyang ig-agaw.
Niduaw siya sa panimalay sa iyang paryente nga si Crisanto Edaño ug pagsulod niini, nikuha sa iyang armas sud sa bag.
Gikablit niya sa makadaghang higayon dihang kalit nga mibuto ug ang bala niigo sa sawog nga semento sa panimalay apan nibanda busa naigo sa tiyan ang biktima nga nagbarog sa gawas.
Gidali sa pagdala ang menor de edad sa tambalanan sa dakbayan sa Bogo.
Ang suspek nasikop sa kapulisan ug mag-atubang sa kasong frustrated murder.