MAGTIGI ang top riders sa Visayas ug Mindanao sa gikaintapang 22nd Lou Ornopia Motocross Cup nga ipahigayon karong Abril 9, a2022 sa MS Motosuit Motorsports Park sa Barangay Calambua, lungsod sa San Remigio, Cebu.
Ang lumba orihinal nga gikatakda karon pa untang Abril 10, 2022 apan nakadesisyon ang tigpasiugda nga si MS Motosuit big boss Lou Ornopia nga iuswag kini sa mas sayo nga petsa aron dili ikasumpaki sa eskedyul ang laing lumba nga ipahigayon sa lungsod sa Consolacion.
Taliwala sa pagkauswag, nagtuo si Ornopia nga daghan gihapong riders ang mosalmot.
“Nag-expect gyud ta og huge turnout sa participants kay it’s been two years since our last race,” matod pa ni Ornopia, kinsa kanhi “Sportsman of the Year” awardee sa Sportwriters Association of Cebu (SAC).
Matod ni Ornopia nga grabe na ang kahidlaw sa riders hilabi na ning higayuna nga usa ka world-class racetrack ang ilang lumbaan.
Lakip sa dekalidad nga riders nga segurado nang mangapil sa lumba mao sila si BJ Pepito, Jon-Jon Adlawan, Venil Abellar, ug Denmark Supatan.
Ang lumba gisuportaan nila ni Cebu 4th District Rep. Janice Z Salimbangon, Board Member Kerrie Shimura, Vice Mayor Al Pestolante, Team Rojo-Pestolante, mayor Erwin Agustino, Hon. Annalyn Flores Toling, Engr. Susan Ornopia, Mike Stoddart, ug mga opisyal sa barangay Calambua.
Miabag sab niini ang RMO Motor Parts ni Boy Ornopia, F&FO Motor Parts, Andy Uy, NF Motor Parts ni Noli Ornopia, Rowena Jubay, N-Style ni Nico Ornopia, Kapenarra ni Zenaida Cataquez, JCO Motor Parts, PLTCOL Joceric De la Pena, PMAJ JR De la pena, JINSP John Pajantoy, Siegfred Ornopia hasta ang Bantay Construction, SNR MBJ Motomaze Shop, Dinah RBS Construction and Supply, LMO Motor Parts ug General Merchandise.