DUHA ka babaye nga nalakip sa listahan sa most wanted person sa kasong illegal recruitment, nadakpan sa mga sakop sa Criminal Investigation and Detection Group (CIDG) Visayas Field Unit 7.
Ang mga nadakpan giila nga silang Jona Luga, taga Kamagong, Barangay Lahug sa siyudad sa Sugbo, hingkod ang pangidaron nga nabutang sa ikatulo nga dapit sa most wanted person city level ug Gretchen Lauron, taga lungsod sa Liloan nga giilang top 4 most wanted sa regional level sa CIDG 7.
Matod ni Police Colonel Ireneo Dalogdog, hepe sa CIDG 7, nga niadtong 2018, gikiha sa mga biktima nga silang Julie Anne Acero ug Johanna Bacasio, pulos taga dakbayan sa Talisay silang Luga, Lauron ug usa ka Efren Lustre nga padayong at large ug pulos mga sakop sa MHD manpower agency nga nahimutang sa Albolario Building, General Maxilom Avenue sa siyudad sa Sugbo.
Giingong gi-recruit ang duha aron patrabahuon sa Macau sa nasod sa China isip mga waitress sa usa ka hotel.
Nagbayad na silag dakong kantidad sa ilang pagproseso sa ilang mga papeles ug pamasahe sa eroplano paingon sa maong nasod.
Gipasaligan sila nga naay mosugat nila sa airport sa Macau apan walay bisan usa ka employer o representante sa ilang trabahoan ang misugat kanila.
Natanggong sila og pila ka buwan sa Macau gani nag-abang pa sila og apartment samtang nagpaabot sa gisaad sa agency kanila.
Tungod kay nawad-an na silag paglaom nga makatrabaho sa China, nakahukom sila nga mamauli na lang ug nireklamo sa Philippine Overseas Employment Administration (POEA) ug didto gihusay apan wala mobayad ang gipangreklamo sa nagasto niini sa mga biktima.
“Actually, nagkaroon ito ng mediation dito sa POEA kung saan ang request sa mga biktima i-refund lang sila sa ilang mga gasto, pero kining mga suspect nagdumili, kaya base sa mga dokumento nga gi-submit para maka-file ng kaso gifilan sila nya kini siya nga kaso no bail bond recommended,” matod ni Dalogdog.
Giangkon ni Dalogdog nga daghan na kaayo ang nabiktima niining illegal recruitment diin dakong kantidad ang nawagtang kanila tungod sa pasalig nga makatrabaho sa gawas sa nasod.
Tungod niini, niawhag ang kapulisan sa publiko nga susihon pag-ayo ang recruitment agency kon lisensyado ba kini sa gobiyerno o ba kaha lihitimo ang pagpangita niining mga trabahante aron dili mabiktima sa illegal nga mga recruiter.
Samtang, moabot usab sa 42 ka mga tawo ang nadakpan sa usa ka semana nga anti-criminality and law enforcement operation sa tibuok rehiyon nga gisugdan niadtong Marso 21-28, 2022.
Ang 23 niini nalakip sa most wanted persons, pito sikop sa kasong paghupot sa dili lisensyadong armas ug 17 ang nasikop nga adunay mga pending warrant of arrest diin sakop matod pa sa criminal gangs sa Central Visayas (CV).
Mas gipanghingusgan pa nila karon ang Oplan Pagtugis diin ang target mao ang most wanted persons ug ang Oplan Paglalansag Omega o ang kampanya batok sa loose firearms nunot sa nagkaduol na nga eleksyon karong Mayo 9, 2022.