USA ka welder nadakpan sa mga sakop sa Criminal Investigation and Detection Group (CIDG) Lapu-lapu City Field Unit human malutsi og warrant of arrest sa kasong homicide.
Ang akusado giila nga si Edmund Callo Vergara, 45, taga Phase 2 Block 18 Lot 22, Haniya Subdivision, Barangay Calawisan, dakbayan sa Lapu-Lapu.
Alas 5:30 sa hapon kagahapon, Abril 4, gi-serve sa CIDG Lapu-Lapu ang warrant of arrest nga giluwatan ni Judge Ronald Caramba Tolentino sa Regional Trial Court Branch 73 sa siyudad sa Lapu-Lapu sa iyang pinuy-anan sa Calawisan.
Matod ni Police Captain Nigel Sanoy, hepe sa CIDG Lapu-Lapu, nga niadtong Disyembre 29, 2021, iyang nakasugat sa Barangay Poblacion ang usa ka lalaki nga hinigugma sa iyang kanhi uyab apan, giingong nagkalalis sila niadtong higayona.
Atol sa ilang kompronta syon, gihan-an siya og sumbag apan iyang natuslokan ang nawong sa biktima sa tumoy sa iyang dalang payong nga niresulta usab sa pagkatumba niini ug naparok ang ulo sa semento.
Wala si Vergara magtuo nga mamatay kini sa tambalanan ug gipasakaan usab siya og kaso sa kabanay sa namatay.
“Wala daw ni siya makahibawo, Sir, nga gikasohan diay siya og homicide and then kay wala man siya giaresto ato nga time,” matod ni Sanoy sa Superbalita Cebu.
Adunay P120,000 nga gitugot nga piyansa ang korte alang sa iyang temporaryong kagawasan samtang padayon ang pagdungog sa kaso batok sa akusado.