SUGDAN karong alas 6:30 sa gabii ang gikaintapang championship best-of-seven series tali sa San Miguel Beermen ug Talk N’ Text KaTropa sa 2019 Philippine Basketball Association (PBA) Commissioner’s Cup sa Araneta coliseum.
Nahan-ay kining maong engkuwentro human gipalagpot sa Beermen ang Rain or Shine Elasto Painters pinaagi sa 98-95 nga kadaugan sa Game 4 nga maoy naghuman og sayo sa ilang semi-finals best-of-five series, 3-1, niadto lang Biyernes.
Ang KaTropa maoy unang nakasulod sa finals pinaagi sa pagpalagpot sa defending champion Brgy. Ginebra Gin Kings, 3-1, sa kaugalingon nilang semi-finals series.
Talagra ra nga magkaabot sa finals ang duha ka higanteng mga puwersa hinungdan nga gikahinaman kining maong series. Sa kinatibuk-an, ikalima pa lang ka kini nga higayon nga magtagbo ang Beermen ug Katropa sa title series.
Una kining nahitabo niadto pang 2005 Fiesta Conference diin gilampaso sa Beermen ang KaTropa sa finals series, 4-1. Niadtong higayuna, ang Beermen gipangulohan pa ni Danny Ildefonso unya si Asi Taulava sa KaTropa.
Nilanat pa og unom ka mga tuig una nagka-engkuwentro’g balik ang duha ka mga kampo. Ning higayuna, gipangmakmak sa KaTropa ang Beermen, 4-2, aron angkunon ang 2011 Philippine Cup title.
Sa samang tuig, nagkasugat na sab sa Governor’s Cup Cup finals ang duha ka mga kampo diin gipakgang sa San Miguel franchise ang tinguha sa KaTropa nga maka-Grandslam pinaagi sa pag-angkon sa kadaugan sa deciding Game 7.
Ninglanat na sab og laing unom ka mga tuig nga nag-abot og balik sa finals ang duha ka mga kampo diin mingdaog ang Beermen sa 2017 Commissioner’s Cup finals series, 4-2.
Kon basihan ang kasaysayan sa panagharong sa duha ka mga kampo sa championship series, tataw nga nakapabor ang Beermen. (ESL)