NASIKOP sa Police Regional Office 7 ang duha ka mga sakop sa criminal group nga naglihok sa Sugbo ug lalawigan sa Bohol nga nalambigit sa illegal drug trade, gun for hire ug illegal gambling niadtong Dominggo, Abril 3, 2022.
Ang mga dinakpan giila ni Police Brigadier General Roque Eduardo Vega, hepe sa Police Regional Office 7 (PRO), nga silang Jomar Ersando Mahilum, alyas “Negs”, 35, taga barangay Parian, dakbayan sa Sugbo ug Longino Torreon Abanyo, 40, taga Purok 4, Barangay Katipunan, lungsod sa Alicia, Probinsya sa Bohol.
Unang nadakpan atol sa hiniusang operation sa mga sakop sa Criminal Investigation and Detection Group Visayas Field Unit 7 uban sa City Mobile Force Company sa Cebu City Police Office si Mahilum sa iyang panimalay sa alas 9:30 sa gabii niadtong Dominggo, Abril 3, 2022.
Siya naaktohan sa kapulisan nga nibaligya og dili lisensyadong armas ngadto sa usa ka police decoy.
Ang dinakpan sakop sa Marvin Group nga nalambigit sa pagpayuhot sa illegal nga drugas, gun for hire, robbery ug gunrunning sa dakbayan sa Sugbo ug mga silingang lungsod sa probinsya sa Sugbo.
Nakuha sa posisyon sa suspek ang duha ka dili lisensyadong mga .38 kalibre nga revolver.
Samtang nadakpan usab sa kapulisan sa lalawigan sa Bohol ang usa ka 40 anyos nga lalaki pinasikad sa search warrant nga giluwatan ni Judge Jorge Tagab Uba sa Municipal Circuit Trial Court (MCTC) sa Purok 4, Barangay Katipunan, lungsod sa Alicia.
Si Longino Abanyo gidakop sa hiniusang pwersa sa CIDG Bohol, Maritime Police ug kapulisan sa maong lungsod nunot sa kalambigitan niini sa illegal nga sugal.
Sakop siya sa nailang grupo sa Bohol nga Opao criminal gang nga nalambigit sa illegal gambling operation sa tibuok probinsya.
Samtang usa ka 57 anyos nga high value individual nadakpan sa buy-bust sa sitio Siwac, Barangay Bulacao, dakbayan sa Sugbo sa mga sakop sa Pardo Police Station.
Ang nadakpan giila nga si Glenn Parba Egdamin, alyas Echok, kinsa nakuhaan og mga pinakete sa gituohang shabu nga mokantidad ang tanan og P680,000 base sa street drug price (SDP).
Matod ni Vega nga magpadayon ang ilang paghingusog sa kampanya batok sa kriminalidad sa tibuok rehiyon ilabi na ning panahon sa eleksyon.
“We will work tirelessly to pursue these criminals who seek to harm the peace and order situation in the region,” matod ni Vega.
Duna pay daghang mga sakop sa mga criminal gang sa Central Visayas ang gipanid-an sa kapulisan nga maoy sunod nga target sa ilang operasyon.