LIMITADO lang alang sa mga imbitado ug mga fully vaccinated individuals ang makasalmot sa Sugat Kabanhawan festival karong tuiga.
Kini maoy gipahibawo ni Marvey Caño, over-all director sa Sugat Festival sa Lungsod sa Minglanilla, Lalawigan sa Sugbo.
Unang gipahibawo ni Jay Fernandez, information officer sa lungsod, nga mobalik na sila sa pagpahigayon sa dugay nang tradisyon sa Minglanilla.
Kini human sa duha ka mga tuig nga nahunong ang maong kalihokan gumikan sa nasinating pandemya sa nasud.
Ang Minglanilla ubos gihapon sa Alert Level 2 nga quarantine classification.
Subay sa datos sa Visayas Vaccination Operations Center (VVOC) niadtong Marso 30, nakuha na sa lungsod ang 75.62 porsyento sa mga nabakunahan batok sa Covid-19.
Bisan pa niini, limitahan gihapon sa kagamhanan ang gidaghanon sa makatambong sa maong kalihukan aron kapugngan ang pagtakboy sa virus.
Kinahanglan usab nga fully vaccinated ang tanang mga partisipante sama sa mga mananayaw, props men, production staff ug uban pa ingon man ang mga manindahay nga mohugop atol sa maong relihiyusong kalihokan sa Minglanilla.
Ang Sugat magsugod kini sa kaadlawon sa Abril 17 diin ipahigayon ang prosesyon ug mga kalihukan sa simbahan.
Sa gabii, ipahigayon ang pasundayag sa sayaw ug selebrasyon.
Aron masiguro ang gidaghanon, adunay tickets nga ipang apod-apod nga maoy basehan sa inspeksyunon sa kapulisan ug health office sa local government unit (LGU.)
“Naa man ta sa Alert Level 2, ato gibuhat ang activity sa outdoor. Ang mga audience are pre-registered. Ang tickets walay bayad. Adto sa tourism office mokuha sila ug mo-register sila upon presenting their vaccination card. Naa nay QR code, by invitation sad ang tickets,” matod ni Caño.
Gipasabot ni Caño nga tungod sab sa nahisinating milabayng bagyo, iyang gihulagway nga simple apan mabulokon nga kasaulogan ang ilang giandam.