MAGSAYSAY, Davao del Sur -- Sikop sa kapulisan sa Magsaysay Municipal Police Station, uban sa 2nd Davao del Sur Provincial Mobile Force Company (DSPMFC) ug sa Regional Mobile Force Battalion (RMFB)-Davao, ang usa ka wanted sa pagpangulata og babaye.

Alas 6:40 sa gabii niadtong Lunes, Abril 4, 2022, nasikop ang suspek nga si alyas Renato, 48, didto sa iyang pinuy-anan sa Purok 2, Barangay New Ilocos, ning lungsod.

Sa report sa Magsaysay police, ang warrant of arrest gipagula ni acting Presiding Judge Carfelita B Cadiente-Flores sa Regional Trial Court (RTC), 11th Judicial Region, Branch 21 sa Bansalan, Davao del Sur, pinetsahan Marso 23, 2022.

Dunay P72,000 nga piyansa ang kaso alang sa temporaryong kagawasan sa suspek nga mao ang pagsupak sa Republic Act 9262 kun Anti-Violence Against Women and their Children sa iyang pagpangulata og babaye.