MIHANYAG og P300,000 nga reward si Manay Municipal Mayor Japhet Quibo sa bisan kinsa nga makatudlo sa mipatay kang Danilo Lumikid Jr. niadtong Abril 1, 2022.

Sa official nga Facebook ni Quibo, gi-post sa mayor ang hanyag sa paghatag og reward alang sa hinanaling pag-ila ug pagkasikop sa responsable.

Una niini, dead on the spot ang kanhi nidagan sa pagka-kagawad sa munisipyo sa Manay, Davao Oriental, human pusila sa wala pa mailhing mamumuno samtang nagmaneho kini sa iyang motorsiklo alas 10:45 sa buntag, Abril 1, 2022.

Giingong gitayming sa suspek nga pusilon ang biktima sa mingaw ug likuon nga dapit sa nahisgutang lugar.

Sa pakighinabi sa Superbalita Davao sa imbestigador nga si Police Senior Master Sergeant Joselito Gomera, giingon niini nga duna na sila'y gitan-aw nga posibleng person of interest sa maong krimen.

Una nang gibutyag nga usa ka vlogger ang biktima, diin giingong ang sagad sa mga posts niini sa social media mahitungod sa politika sa ilang lungsod.

Ang kapulisan sa Manay padayong naghimo og makuting imbestigasyon labot sa krimen.