MARCELO T. DANO, JR.
Abuno, Pajac, Lapu-Lapu City, Cebu
Gihalad ko na ang tanang pulong
Sa imong dunggan ug gihablon ko na
Ang tanang sonata sa imong dughan
Kay buot kong sugdan ang duha nato
Ka sugilanon sa usa ka kum-os nga papel
Diin ikaw ug ako usa ka panganod
Nga buot dakpon ang usag-usa
Ngadto sa kawanangan sa uniberso
Ug dayon kitang duha mangandoy
Hangtod sa tukmang takna kanus-a
Ang atong pagpanamin dunay laing
Repleksyon sa usa ka batang pinangga.
Apan mas handurawon pa natong duha
Kon giunsa pagbuak sa iyang lanog
Nga paghilak ang kaadlawon samtang
Gipangita nato ang usag-usa ilawom
Sa nagbigang habol diin ikaw ug ako
Ug ang nag-abot tang kainit andam
Nang mobuto.