DEAD on the spot ang usa ka edaran human dunggaba sa edaran sab nga iyang kalalis alas 6:30 sa buntag niadtong Abril 5, 2022 didto sa Davao Bukidnon Road, Barangay Catalunan Pequeño, Davao City.

Ang biktima giila sa kapulisan sa Police Station 17 nga si Arturo Pelare Pansoy, 73-anyos, minyo ug residente sa Purok 18, Batallia Village sa nahisgutang barangay, samtang ang suspek nailhang si Celestino dela Cerna Satur, 69-anyos, nagpuyo sa Purok 4 sa nasampit sab nga barangay.

Subay sa inisyal nga taho gikan sa kapulisan sa Baliok, ang duruha naglalis gumikan sa ilang daan nga dumot-personal diin kalit gidunggab sa suspek sa makadaghang higayon ang biktima gamit ang tactical knife nga miresulta sa kamatayon sa biktima.

Atol sa hitabo, usa ka pulis ang nakasaksi, hinungdan nga dali kining giulang apan buot untang dunggabon sa suspek ang pulis, diin suwerte nga nakalikay kini.

Daling girespondehan ang nasampit nga pulis sa mga tanod sa barangay ug kaubanang pulis hinungdan nga nasikop ang suspek ug nakuha sa posisyon niini ang gigamit nga kutsilyo sa krimen.

Gikustodiya na sa kapulisan sa Baliok PNP ang nasampit nga suspek.